बटन दबै की मुख्यमंत्री कायी पिंसन कु भगुतान

मुख्यमंत्री धामिन आज समाज कल्याण विभागा का पिंसनरू तैं एक बटन दबै कि अप्रैल मैना पिंसन कु भगुतान कायी।
जैमा शत प्रतिशत राज्य की योजनौं का 7,56,682 पिंसनरू तैं 111 करोड़ 82 लाख 52 हजार रुप्यौं कु भुगतान करे ग्यायी।

जैमा वृद्धावस्था, विधवा, दिव्यांग, किसान, परित्यक्ता, भरण पोषण अनुदान, तीलू रौतेली अर बौना पिंसन सामिल च।

सचिवालय में उर्यूं ऐ कार्यक्रम मा मुख्यमंत्रिन बोलिकि सरकार समाजिक रुय से कमजोर वर्ग तैं मजबूत बणौंण वास्ता सशक्तिकरण पर खास ध्यान देंणि च। उन्न बोलि हरेक जरुरमंद मनखि तैं समाज कल्याण विभाग बटि पिंसन मिल्यां यांका वास्ता कैम्प लग्यें जाणा छन। जै से अबि तक 60 हजार से जादा नै लोगु समाज कल्याण पिंसन से जुड़ा छन।

मुख्यमंत्रिन अप्सरू तैं निर्देश दींन की अगनै बि इन्ना कैम्प उर्यें ज्यां। यांका दगड़ि 59 साल पूरा हूंण वला लोगु कु सर्वे कैकि जु बि पिंसन लिंणा हकदार छन, युंका कागज पतर करण खुणि बि बोलि, जै से जन्नि वु साठ साला का होला ऊंतै सरकरि योजनों कु फैदा मिलि सक्यां।

मुख्यमंत्रिन बोलिकि जादा से जादा लोगु तैं योजनौं कु फैदा मिल्यां, यांका वास्ता पिंसन योजना अर हौरि विभाग की जु बि योजना छन वुंकी सर्या जाणकारी सबि एक हि जागा पर दिये ज्यां।

मुख्यमंत्रिन न अधिकारियों तैं बोलिकि कॉल सेंटरू जरिया दाना अर पिंसन लिंण वला दगड़ि बात बि करे ज्यां।

ऐ मौका फर विभागीय मंत्री खजान दास न बोलि कि मुख्यमंत्री धामी हरेक मनखि कु ख्याल रखणा छन।
उन्न बोलि कि पिंसन योजना पूरि तरौं छाळी (पारदर्शी) छन।