उत्तराखण्ड देवभूमि च, यख पलास्टिक कु खैड़ उंडु-फुंडु नी ध्वल्याँ : सीएम धामी

केदारधाम तैं पलास्टिक से मुक्त करणा वास्ता नगर पंचैत कोसिस रंग ल्याणि च। केदारनाथ जातरा सुरू हूंणा एक हप्तम हि नगर पंचैतन एक हजार किलो से जादा पलास्टिक कु खैड़ कट्ठा कै याली।

नगर पंचैत न गिल्लु खैड़ कु निपटारु करणा वास्ता पक्का पिट बणौंणि वलि च।

मुख्यमंत्री धामिन कु ब्वनु च कि उत्तराखण्ड देवभूमि यख औंण वला हरेक जातरी से हमरि विनति च कि प्लास्टिक कु खैड़ तैं उंडु-फुंडु नी ध्वल्याँ।

उत्तराखण्ड सरकार तीर्थ जगौं का दगड़ा-दगड़ि यखकि पवेत्र गदनो अर हिमालय कु पर्यावरण बचौंणा वास्ता हरेक तरों की कोसिस करणि च। चारधाम दगड़ि जातरा बाटा फर नगर पालिका अर ग्राम पंचैत खळाखळ सफै करणि च।

ज्योर्तिलिंग श्री केदारनाथ धाम पाट 22 अप्रैल खुलि ख्वलें ग्येन। जातरा सुरु हूंणि से पैलि यख खुब जातरि औंणा छन। इल्लै धाम मा खुब प्लास्टिक कु खैड़ हूंणू च। जैमा पाणि की बोतल जादा छन।

पलास्टिक कु खैड़ तैं खतम करणा वास्ता नगर पंचैत पैलि बिटि त्यार च। नगर पंचैतन धाम मा 3 हजार वर्ग फीट क्षेत्रम पलास्टिक कु खैड़ कट्ठा करणि च। पलास्टिक कु खैड़ अर हौरि कट्ठा खैड़ तैं अलग करे जाणु च। जैमा पलास्टिक कु खैड़, कांच अर टिन लारा सामिल छन। इतगै ही ना बल नगर पंचैतन कॉम्पेक्टर मसीन बि लग्यीं च। ज्वां बोतळ अर पलास्टिक कु खैड़ तैं पिचकैकि 30 से 40 किलो की फंचि बणाणि च।

नगर पंचैत अधिशासी अधिकारी न बतै कि एक सप्तम एक हजार किलो प्लास्टिक कु खैड़ जमा करै जाणु च। जैंतैं बेच्यें जालु। उन्न बोलिकि कांच, टिन अर हौरि खैड़ बि जमा करे जाणु च।

धाम मा द्वि दा सफै कु काम हूंणू च। 55 सफै कर्मी काम फर लग्यां छन।
बाट मा बि सैफ कु काम हूंणू च।