केतन लाल कतल मा द्वी हौरि दोषी गिरफ्दार
लम्ब गौं टिरी थाणा क्षेत्रम खोलगढ़ गौं म एक दलित नौंनु केतन लाल कु कतल का मामलम पुलिसन बड़ी कारवै कायी। ऐ मामला म द्वी हौरि अरोपी तैं पुलिसन गिरफ्दाऱ कै याली। ये मामला म अबि तक 4 दोषियों तैं पुलिसन गिरफ्दार कै याली।
बतै दियां की 8 जन खुणि लम्ब गौं टिरी का देवल गौं का रैवासी धनपाल लाल न थाणा लम्ब गौं मा एक शिकैत कायी। शिकैत मा उन्न अरोप लगै कि ऊंका ब्यटा केतन लाल अर दिवाकर डिमरी दगड़ि विद्याधर पंवार कु नौंनु यशवीर सिंह पंवार अर वैका घार वळों न एक उबरा मा बंद कैकि मारपिटै कायी।
उन्न बोलिकि मारपिटै मा केतन लाल तैं बौत जादा चोट लगिन अर वैकी हालत बौत खराब ह्वेग्यायी। यांका बाद इलाज का वास्ता व अस्पताल मा लिजै ग्यायी। जख इलाज करण दा वैकी मौत ह्वेग्ये। यीं मारपिटै मा दिवाकर डिमरी कु हत्थ टूटिग्ये। वैकु जिला अस्पताल बौराड़ी मा इलाज चलणु च।
ये मामला मा लम्ब गौं थाणा म धारा 103 (1), 3(5) बीएनएस अर 3(2)(अ) एससी/एसटी अधिनियम का अंतर्गत अभियोग पंजीकृत करे ग्यायी।
मामला तैं देखिकि टिरी एसएसपी श्वेता चौबे न अपर पुलिस अधीक्षक तैं मामला की जांच अर दोषियों तैं गिरफ्दार करणा निर्देश दींन। जैका बाद पुलिसन द्वी दोषी यशवीर अर विद्या पंवार तैं पैलि पकड़ि याली छायी।
यांका बाद एसएसपी, टिरी श्वेता चौबे न बतै कि पुलिस सबुत जमा करिन अर लोगु का बयानु का अधार फर 11 जून खुणि द्वी हौरि आरोपि सचिन सिंह पंवार अर सुमित प्रसाद तैं पकड़ि याली।