अग्निवीर का वास्ता बण्यें जालु ‘अग्निवीर सेल’ : मुख्यमंत्री धामी

देरादूण। मुख्यमंत्री धामिन यूथ फाण्डेशन टेªनिंग एरिया -कुआंवाला, देरादूण मा यूथ फाण्डेशन कु उर्यूं ‘युवा अग्निवीर संवाद ’ कार्यक्रम मा भाग ल्यायी।

ऐ मौका फर मुख्यमंत्रिन पर्यटन विभागा होमस्टे योजना क जरिया पूर्व सैनिक अर अग्निवीरु खुणि होमस्टे बणौंणा का वास्ता खास अनुदान, दूर गौं मा रैंण वला रैवासियों, पूर्व सैनिक अर अग्निवीर का वास्ता स्वरूजगार का वास्ता विशेष अनुदान अग्निवीर बिटि रिटैर हूयां अग्निवीर तैं लाभ देंणा का वास्ता एक सेल बणौंणा की घोषणा कायी।

मुख्यमंत्रिन बोलिकि अग्निवीर, सैनिक अर शहीदु का परिवार का भलै का वास्ता प्रदेस सरकार खळाखळ काम करणि च। शहीद परिवार तैं मिलण वलि अनुग्रह राशि तैं 10 लाख रुप्यौं से बढ़ैकि 50 लाख रुप्या करे ग्यायी। अग्निवीर से संवाद मा मुख्यमंत्रिन बोलिकि अग्निवीर कु सम्मान, प्रदेस सरकार की पैलि प्राथमिकता च। फौज मा भर्ति हूंण वला युवाओं खुणि प्रदेस सरकार मुफत प्रशिक्षण कु बन्दुबस्त करणि च। नौकरि पूरि करण वला अग्निवीरू तैं पुलिस, वन विभाग, आपदा प्रबंधन अर सरकरि नौकरि सेवा मा 10 प्रतिशत क्षैतिज आरक्षण की व्यवस्था करे ग्यायी। मुख्यमंत्रिन बोलिकि उत्तराखण्ड देस कु पैळु प्रदेस बणणु च, जख अग्निवीर का वास्ता खास ‘अग्निवीर सेल’ बण्यें जालु। उन्न बोलिकि प्रदेस कु मुख्य सेवक का रुप मा उन्न सदनि जनता की सेवा कायी।

मुख्यमंत्रिन बोलिकि मि बि एक सैनिक कु ब्यटा छौ, उन्न बचपण बिटि फौज कु अनुशासन, त्याग अर देसभक्ति देखि। उन्न अपणि जिन्दगि म संस्कार, अनुशासन अपणा बुबा बिटि सीखिन। उन्न बोलिकि प्रदेस सरकार न भर्ति घोटालौं तैं गंभीरता से ल्यायी अर सखत नकल विरोधी कानून बणै, जैमा उमर कैदा तक की सजा कु प्रावधान च। 100 से जादा नकल माफियौं तैं जेल भेजणा कु काम कायी। सखत नकल विरोधी कानून कु नतीजा च कि आज उत्तराखण्ड मा रिकॉर्ड भर्ति हूयीं। पिछल 5 सालु मा 34 हजार से जादा ज्वानु तैं सरकरि नौकरि मिलि। मुख्यमंत्रिन बोलिकि उत्तराखण्ड देस कु पैलु प्रदेस च जख मदरसा बोर्ड तैं खतम करे ग्यायी। प्रदेसम किसाणु का वास्ता कीवी, एप्पल, टिमरू, जन्नि बौत सर्या योजना चलणि छन। उन्न बोलिकि प्रदेसम ज्वानु तैं अपणु घार-गौं मा रुजगार करण खुणि बढ़ावा दिये जाणु च।