उपराष्ट्रपति सी.पी. राधाकृष्णन एम्स ऋषिकेशा दीक्षांत समारोह मा ल्यायी भाग
दीक्षांत समारोह सिरफ अनुशासित कोसिस अर त्याग की मिसाल हि नी च, बल समाज अर देसा प्रति बौत बड़ी जिम्मेबरि की सुरुवात बि च। या बात उपराष्ट्रपति सी.पी. राधाकृष्णन आज ऋषिकेशा अखिल भारतीय आयुर्विज्ञान संस्थान मा दीक्षांत समारोह मा बोलि।
राष्ट्रपतिन समावेशी विकास तैं अगनै बढ़ौंणा, बुनियाद ढांचा तैं हौरि कटकुटु करणा अर स्वास्थ्य सेवा तैं लोगु तैं पौंछणा वास्ता मुख्यमंत्री धामि की खुब तरिफ कायी।
यां से पैलि राज्यपाल लेफ्टिनेंट जनरल गुरमीत सिंह (से.नि.) उपराष्ट्रपति सी.पी. राधाकृष्णन कु देवभूमि उत्तराखण्ड मा स्वागत कायी अर बोलिकि ऊंका बत्यां बाटु से नै डागटरू तैं देसा की सेवा करणा वास्ता नै तागत अर नै दिसा मिललि।
मुख्यमंत्री धामीन उपाधि मिलण वला सबि पढ़दरौं तैं बधै द्यायी अर बोलिकि यु मौका जिन्दगि की एक नै सुरुवात च अर चिकित्सा तोकम ऊंकु योगदान समाज अर देस तैं अगनै बढ़ौंणा वास्ता खास होलु।
मुख्ममंत्री धामिन बोलिकि पैल्यक प्रधानमंत्री स्व. अटल विहारी वाजपेयी कु बण्यूं एम्स ऋषिकेश आज प्रेदसा वास्ता एक जिन्दगि देंण वलु संस्थान च। यख कैंसर, न्यूरोसर्जरी, रोबोटिक सर्जरी अर जॉइंट रिप्लेसमेंट जन्नि सुविधा छन। यांका दगड़ि हवै एम्बुलेंस सेवा बि खास च।
मुख्यमंत्रिन बोलिकि ऊधमसिंह नगरम एम्स ऋषिकेश कु सैटेलाइट सेंटर बणणा कु काम बौत तेजी से हूंणू च, यां से कुमौ क्षेत्रा की जनता तैं बि अच्छु इलाज मिललि।
ऐ मौका फर पैल्यका मुख्यमंत्री त्रिवेंद्र सिंह रावत, सांसद नरेश बंसल, महेंद्र भट्ट, एम्स ऋषिकेशा अध्यक्ष प्रो. राज बहादुर छायीं।