महिला आरक्षण बिल फर राजनीतिक घमाचूर, कांग्रेसन विधानसभा समणि द्यायी धरना

महिला आरक्षण बिल पर सर्या देसम खुब राजनीति हूंणि च। ऐ मुद्दा फर आज उत्तराखण्ड कांग्रेसन देरादूण विधानसभा का भैर सरकार खिलाप धरना द्यायी। कांग्रेसन बोलिकि साल 2023सम लोकसभा अर राज्य सभा जु महिला आरक्षण बिल पास ह्वे छायीं, वै बिल फर हि ब्यटुलौं तैं 33 प्रतिशत आरक्षण दिये ज्यां।

हरीश रावतन बोलिकि कांग्रेस, सरकार तैं यु बतौंणा वास्ता अयीं च कि सरकार अपुण छल अर झूठ ब्वलणु बंद कर्यां। उन्न बोलि सबि जणदा छन कि भाजपा सरकार पैलि बटि ब्यटुलौं तैं 33 प्रतिशत आरक्षण देंणु नी चाणि छायीं। इल्लै भाजपन साल 2023सम जु महिला विधयेक पारित ह्वे छायीं वैंथै लागू नी कायी। अर साल2026 सम भाजपन महिला बिल तैं परिसीमन बिल दगड़ि जोड़िकि यु बतौंणा कोसिस करणि च की महिला पास नी ह्वे।

हरीश रावतन बोलिकि 2023सम जब संसदम महिला आरक्षण बिल पास ह्वेग्यायी, त दुबरा महिला आरक्षण बिल तैं परिसीमन दगड़ि ज्वड़णु सरकार कु छल नी त क्य च।

वखि गणेश गोदियालन बोलिकि कांग्रेसन यु प्रदर्शन भाजपा कु झूठ प्रदेसा लोगु तैं बतौंणा वास्ता कायी। उन्न बोलि कि प्रदेस सरकारन एक दिनकु विधानसभा उर्यौंणा कु फैसला कै याली। कांग्रेस पैलि बिटि ब्वनि च कि यु सत्र सिरफ अर सिरफ कांग्रेस तैं कोसणा (कोसने) वास्ता बल्यें ग्यायी। उन्न बोलि सच च त यों च कि हम ता चाण छा कि महिला आरक्षण बिल लागू करै ज्यां।

गणेश गोदियालन बोलिकि भाजपा सरकार महिला आरक्षण बिल तैं अड़ग्यौंणा (अटकाना/रोकने) कु काम करणि च अर उल्टा यांकु ठिकरु बि कांग्रेसा मुण्ड मा हि फोड़णि च। उन्न बोलि उन्न बोलि कांग्रेस पार्टी सदनि ब्यटुलौं तैं आरक्षण देंणा पक्षम रायी। साल 2023सम जु महिला आरक्षण बिल पास ह्वे, वु बिल भि कांग्रेसा मदत से हि पास ह्वे, यांका बाद बि भाजपा सरकार महिला आरक्षण कु नौ फर सर्या देसम झूठ ब्वना कु काम करणि च।