नसा मुक्ति कु रैबार हरेक घार अर हरेक गौं तक पौंछण प्वाड़ल: मुख्यमंत्री धामी

मुख्यमंत्री धामिन डॉ. बी.आर. अम्बेकर गिरौड़ ओएनजीसी देरादूण मा उर्यूं ‘ड्रग्स फ्री उत्तराखण्ड वॉकाथॉन’ तैं हारु झण्डा दिखै अर नशामुक्त उत्तराखण्ड की सौं दिलै।

ऐ मौका फर मुख्यमंत्रिन सबि ज्वानु तैं नशामुक्ति उत्तराखण्ड बणौंणा का अपणि जिम्मेदरि निभौंणा की विनती कायी। मुख्यमंत्रिन बोलिकि नशामुक्त उत्तराखण्ड वॉकाथॉन सिरफ एक कौथिग नीं च, बल यु समाज तैं हमर समाज तैं स्वस्थ अर मजबूत बणौंणा वास्ता एक खास रैबार देंणा कु कौथिग च। उन्न बोलिकि नशा खिलाप लोगु तैं बतौंण का दगड़ि ज्वानु तैं अच्छी दिसा मा अगनै बढ़णा का वास्ता बाटु मिलिदि। मुख्यमंत्रिन बोलिकि नसा मनखि की सिहत अर भवेष्या दगड़ि ऊंका कुटुम्दरि अर समाज फर बि असर डळदु। जै ज्वान का हत्थ मा किबात हूूंण चैंद, जैथै खेल कु मैदान मा अपणु खेल दिखौंणा चैंद अर अपणि मेनत से भवेष्य बणौंण चैंद, वैथें अगर नसा की लत लगि जाली त वैंका स्वींणों का दगड़ा-दगड़ि वैकी कुटुम्दरि की उमेद बि टुटि जाली। इल्लै ज्वानु तैं नसा से दूर कैकि ऊंकु हुनर तैं सै दिसा देणु हम सब्यौं की जिम्मेबरि च।

मुख्यमंत्रिन बोलिकि युवा प्रदेस की सबसे बड़ी तागत छन। उन्न बोलि ज्वानु तैं अपणि मेनत, हुनर का बल फर जिन्दगि मा अगनै बढ़ण चैंद। नसा से दूर रैंणा का वास्ता, खेल, योगा, कसरत तैं अपणि जिन्दगि कु हिस्सा बणौंणे जरुरत च। अच्छु संगीत, अच्छी सोच ज्वानु तैं अच्छु भवेष्य तरफ लिजान्द। उन्न ज्वानु से विनति कायी कि वु नसा से दूर रैंणा का दगड़ि अपणा दगड़ियों तैं बि नसा से दूर रैंणा अर वैका फैदा बत्याँ। मुख्यमंत्रिन बोलिकि नसा का खिलाप लडै़ सिरफ सरकार अर पुलिस की कोसिस नी जितै जै सकदि। यांका वास्ता समाज, शिक्षक, अर समाज का हरेक मनखि तैं अपणि जिम्मेबरि निभौंण प्वाड़लि। इस्कुळ, महाविद्यालय अर दप्तरु बटि नसा मुक्ति कु रैबार हरेक घार अर हरेक गौं तक पौंछण प्वाड़लु।