गौचर म्यळा उत्तराखण्ड की विरासत, परंपरा अर सांस्कृतिक पछ्याण कुं ज्यूंद उदाहरण च: मुख्यमंत्री धामी

मुख्यमंत्री धामिन गौचर मा राजकीय औद्योगिक विकास एवं सांस्कृतिक गौचर म्यळा मा पूजा अर दीप जगै कि सुरु कायी।

मुख्यमंत्रिन म्यळा का संस्थापक गोविन्द प्रसाद नौटियाल की प्रतिमा पर फुल चढै़। ऐ मौका फर इस्कुल्यां नौन्यिालु सांस्कृतिक कार्यक्रम कैकि लोक संस्कृति कु रंग भोरि द्यायी।

मुख्यमंत्री धामिन बोलिकि गौचर म्यळा सिरफ एक कार्यक्रम ही ना बल उत्तराखण्ड की विरासत, परंपरा अर सांस्कृतिक पछ्याण कु ज्यूंद उदाहरण च। साल 1943 मा यखक ब्यौपारी, समाजसेवी अर प्रशासन की मदत से भोटिया ब्यौपार म्यळक रुप मा यांकी सुरुवात ह्वे। उबरि गौचर भारत-तिब्बत ब्यौपार की एक जगा छायीं। जख ऊन, पश्मीना, जड़ी-बूटि अर हौरि घर्या चीजु कु ब्यौपार हूंदू छायीं।
आज यु औद्योगिक एवं सांस्कृतिक म्यळन परदेस हि ना, बल सर्या देसम अपणि अलग पछ्याण बणै याली।
मुख्यमंत्रिन बोलिकि गौचर म्यळा यखक बड़ा ब्यौपारी, छ्वटा ब्यौपारी, कारीगर, अर स्वयं सहायता समूहों तैं अपणि चीजु तैं बेचणा कु एक मंच दिंद।

मुख्यमंत्रिन बोलिकि म्यळा हमरि लोक संस्कृति, लोक कला, विरासत तैं बचौंणा का दगड़ि समाज तैं जोड़णा कु बि काम करदन। पीढ़ियों बटि चलणि इन्नि परंपरा तैं सैंती समाळी की अर औंण वलि पीढ़ि तक पौंछाणा की हम सब्यों की जिम्मेबरि च।
मुख्यमंत्रिन चमोली जिला का बारम बोलि कि यख भगवान बदरी विशाल, मां नंदा कु मैत, अर चिपको आंदोलन की जलमभूमिच। यखकि वीर भूमि देस की सीमा की रगक्षा का वास्ता कै वीर दींन, जौन देस की रगक्षा का वास्ता अपडु सर्वोच्च बलिदान द्यायी।