कानून से बडु़ क्वीं संगठन नीं च
कानून कु राज लोकतांत्रिक व्यवस्था की सबसे बड़ी तागत हूंद। कानून खुणि न क्वीं बडु़ हूंद, अर न क्वीं छ्वटु हूंद। कानून कै संगठन से जुड्यां हूंणा कारण वैथैं क्वीं खास अधिकारी भि नी दिंदु। पर जब क्वीं संगठन अपणा कै सदस्य की गिरफ्दारी का बाद पुलिस फर हि अरोप लगौंदु अर अपणा दगड़्यां तैं बेकसूर साबित करणा का वास्ता पुलिस तैं अपणि तागत दिखौंणा कोसिस करदु त सवाल खड़ा हि होला कि आखिर या कन्नि व्यवस्था बणौंण की कोसिस हूंणि च?
देराूणम 14 लाख रुप्यौं की लूट मामला मा बजरंग दल का कार्यकर्ता सिद्धांत बड़ोनी की गिरफ्दारी का बाद, जु बजरंग दलन कायी यां फर सवाल खड़ा हूंणा छन। पुलिसन ऐ मामला मा जांच का बाद सिद्धांत बड़ोनी का दगड़ि सात लोगु तैं गिरफ्दार कायी अर न्यायालय मा हाजिर करणा का बाद जेल भेजि द्यायी। पुलिस कु ब्वनु च कि या गिरफ्दारी गवा का बयान अर इलेक्ट्रॉनिक सबूत का अधार पर करे ग्यायी। दूसरि तरफा बजरंग दल न गिरफ्दारी तैं गलत बतै अर पुलिसा की कारवै फर सवाल खड़ा करिन।
संगठन कु अपणि कार्यकर्ता का दगड़ि खड़ु हूंणू क्वीं नै बात नीं च अर गलत भि नीं च। अब अगर बजरंग दल तैं इन्नु लगणु च कि ऊंका कार्यकर्ता का दगड़ि कुछ गलत ह्वे, वैतैं झुट्टु मामला मा फंसयें ग्यायी, अर वुंका का दगड्यां का दगड़ि पुलिसन मारपिटै कायी, त यांकी सिकैत अर जांच करणा कु बजरंग दल कु पूरु अधिकार च।
पर सवाल यों च कि क्य ऐ अधिकार का पिछनै लुकिकि पुलिस फर दबौ बणौंणा की कोसिस सै च?बजरंग दल का नेतौं न पटेलनगर थाणा प्रभारी पर फर्जी मुठभेड़, धमकौंणा कु, भू-माफिया का दगुड़ करणा कु अरोप बि लगैन। यख तक कि उन्न पुलिस मुख्यालय पौंछिकि हनुमान चालीसा कु पाठ भि कायी अर सीबीआई जांच करण की मांग कायी।
बजरंग दलन अपड़ा कार्यकता तैं समाज की सेवा करण वलु बतै अर बोलिकि वु इन्नु अपराध कन्नु कैकि कै सकदु। पर संगठन की समाजिक पछ्याण या समाज सेवा कु काम, बजरंग दल का कार्यकर्ता कु बेकसूर हूंणा कु सबूत बि त नीं ह्वे कसदु। किलैकि दोषी की जांच मनखि का चरित्र, संगठन या सामाजिक पछ्याण से ना बल, सबूत का अधार पर हूंद।
यखम सवाल बजरंग दल फर बि च की ऊंकु कार्यकर्ता बकसूरबार नीं च, अर वे फर वुथैं पूरू भरोसु च, त बजरंग दल तैं न्याय कु इंतजार करण चैंद। बजरंग दल मा क्वीं सबूत छन, त सबूत जांच एजेंसी अर न्यायालय का समणि रखण चैंदन। आखिर दोषि तैं बेकसूर साबित करणा का वास्ता बजरंग दल कानून अपणा हत्थ मा कन्नु कैकि ले सकदु।
क्य कै राजनीतिक दल या संगठन का दबौ मा पुलिस तैं अपणि जांच कर तरीका बदलि करण चैंद क्या दोषि तैं बेकसूर साबित करणा वास्ता पुलिस मुख्यालय मा प्रदर्शन करणु न्याय व्यवस्था फर असर डलणन की नीं च ?
यखम हमतैं या बात बि समझण प्वाड़लि की पुलिस कारवै पर सवाल उठौंणा अर पुलिस फर दबौ बणौंणा की द्वी अलग-अलग कोसिस छन। अगर पुलिस गलत च त पुलिस का खिलाप जांच हूंण चैंद। दोषी का दगड़ि मारपिटै ह्वे त यांकी जांच हूंण चैंद अर जु बि पुलिस वलु दोषी च वै फर कारवै हूंण चैंद। लेकिन पुलिस फर लग्यां आरोप की जांच बि कानून से हि होलु, ना कि बजरंल दल की तागत दिखौंण से।
यामा सबसे चिंतै बात च की आज एक संगठन अपणि कार्यकर्ता तैं बचौंणा वास्ता पुलिस पर दबौ बणौंणु च, त भोळ दुसर संगठन बि इन्नु हि कारलु त कानून व्यवस्था कु क्या होलु? क्य पुलिस जांच से पैलि इन्नु देख्यलि कि दोषी कै संगठन से जुड़यूं च अर वैंका पिछने कतगा लोग खड़ा छन। अगर इन्नु होलु त लोगुकु कानून अर पुलिस पर बिटि भरोसु कम होलु।
बजरंग दल तैं भि समझण पोड़लु कि संगठन की तागत कानून से बड़ी नीं ह्वे सकदि। हनुमान चालीसा कु पाठ आस्था कु बिसय च, पर धार्मिक आस्था तैं कै मनखि कु पक्ष मा पुलिस पर बदौ बणौंणा कु जरिया नीं बण्यें जै सकदु। भगवान हनुमान कु नौं लेकैकि निसाब की मांग करणु अलग बात च अर न्यायिक प्रक्रिया फर असर डलणा की कोसिस करणु अलग बात च।
सरकार अर पुलिस मुख्यालय की जिम्मेबरि भी कम नीं च। पुलिस तैं चैंद की जांच फर कै संगठन कु बदौ कु असर नीं हूंण चैंद। पुलिस तै सबि आरोपु की खळखळि (निष्पक्ष) जांच करण चैंद। अर क्वीं संगठन, क्वीं मनखि कानून व्यवस्था तैं बिगड़णा कु धमकौंणा कु जांच पर असर डलणा कु दोषी च त वैका खिलाप बि कारवै हूंण चैंद। संगठन कु सदस्य हूंया या क्वीं मनखि कानून सब्यों का वास्ता बराबर हूंण चैंद।
आखिरम सवाल सिरफ सिद्धांत बड़ोनी की गिरफ्दारी कु नीं च, बल यीं सोच कु च, जैमा संगठन अपणा कार्यकर्ता तैं बचौंणा का वास्ता कानून अर व्यवस्था तैं चुनौती देंणु च। लोकतंत्र मा विरोध करणा कु, सवाल उठौंणा कु अर न्याय मंगणा कु अधिकार सबि तैं च, पर कैथैं बि कानून अपणा हत्थ मा लिंणा कु अर अप्पु तैं कानून से बडु समझणा कु अधिकार नीं च।
अगर बजरंग दल तैं अपड़ा कार्यकर्ता फर भरोसु च त वैंथे अदालत मा साबित करण चैंद, पुलिस मुख्यालय मा तागत दिखै की ना।
आखिर कानून कु राज लोकतंत्र की बुन्याद च, अर यीं बुन्याद तैं कमजोर करणा कु अधिकारी कैथैं बि नीं च।
