धर्मपुर विधानसभा मा ‘युवा संकल्प रैली’ कु ह्वे शंखनाद स्थानीय अर युवा नेता तैं जिम्मेदारी देंणा की उठी मांग

2027 विधानसभा चुनाव तैं लेकैकि 18-धर्मपुर विधानसभा क्षेत्र मा राजनीतिक गतिविधि तेज ह्वेग्येन। पिछल इत्वार खुणि क्षेत्र का ज्वानु न एक बौत बड़ी रैली निकाळि, जैथे नौं दिए ग्यायी ‘युवा संकल्प रैली’। यीं रैली कु मुख्य उद्देश्य क्षेत्र कु विकास मा युवाओं की भागीदारी तैं बढ़ाणु अर स्थानीय मुद्दों तैं प्रमुखता से उठाणु छायी।

कार्यक्रमा की अध्यक्षता डीएवी पीजी महाविद्यालय का पैल्यक छात्रसंघ अध्यक्ष अर मोथरोवाला का पैल्यक क्षेत्र पंचैत सदस्य महेश जगूड़िन् कायी।

रैली मा धर्मपुर विधानसभा का सबि वार्डों अर गौं-गांव बटि पौंछयाँ ज्वानु न एक अवाज मा बोली की 2027 चुनाव मा धर्मपुर बटि टिकट सिरफ विधानसभा मा रैंण वाला (स्थानीय) नेता तैं ही मिलण चैंद, जै से क्षेत्रा कु विकास तेजी से ह्वे साकलु।

विधानसभा कु रैवासी: आखिर क्य छन याका मायने?
यीं रैलिन धर्मपुर मा एक नै बहस छेड़ि द्यायी कि हमरू प्रतिनिधि विधानसभा मा ही रैंण वलु हूंण कतगा जरूरी च। राजनीतिक जानकारों कु ब्वन च कि स्थानीय विधायक हूंणा कई फैदा छन जन्ना की-

सीधा संवाद अर उपलब्धताः
विधायक तैं ढूंढण का वास्ता चक्कर नी कटण प्वाड़ला। विधायक सुख-दुख मा सीधा जनता का बीच रालु।

जमीनी समस्याओं की समझः
जु विधायक अपणि विधानसभा मा रालु, तैंथे बिजली-पाणि की किल्लत, सड़कों की खस्ता हाल अर जलभराव जन्नि स्थानीय दिक्कतों कु सीधा अहसास रालु।

जादा जवाबदेहीः
विधानसभा मा रैंण वलु हूंणा कारण जनता दगड़ि सीधा जुड़ाव रालु, यां से विधायक की जनता का प्रति जवाबदेही और ज्यादा बढ़ि जालि।

महेश जगूड़ी न ब्वलिः
‘धर्मपुर की जनता तैं अब समझ मा ऐग्ये च कि युवौंक हित की रक्षा अर क्षेत्र कु विकास का वास्ता विधानसभा की कमान इन्न हत्थु मा हूंण चैंद, जु दिन-रात जनता का बीच मा रैयां। रैली मा अयां युवा साफ रैबार दिंणा छन कि औंण वाला विधानसभा चुनाव मा वे उम्मीदवार तैं ही प्राथमिकता दिए जाली, जु धर्मपुर विधानसभा कु रैवासी होलु अर युवौं की अवाज तैं विधानसभा मा मजबूती से उठौंणा का काम कारलु।’