योग देस की पूरणि सांस्कृतिक धरोहर च : CM Dhami

मुख्यमंत्री धामिन पुलिस लैन देरादूण मा बारौं अंतराष्ट्रीय योग दिवसा मौका फर उर्यूं रन फॉर योगा कार्यक्रम मा भाग ल्यायी।

ऐ मौका फर मुख्यमंत्रिन बोलिकि यु कार्यक्रम सिरफ एक दौड़ ना, बल स्वस्थ जीवन अर सकारात्मक सोच अर योग तैं लोगु तक पौंछाणा कु अभियान च। मुख्यमंत्री धामिन बोलिकि देवभूमि उत्तराखण्डम पूरण जमना बटि योग, आध्यात्मिक साधना अर ऋषि-मुनियों की तपस्थली रायी। यख कु जस, परंपरा अर प्राकृतिक वातावरण मनख्यात तैं सिहत (स्वास्थ्य) अर सकारात्मक जिन्दगि कु रैबार दिन्द। उन्न बोलिकि योग भारत की पूरणि सांस्कृतिक धरोहर च, ज्वा शरैल, ज्यूं अर आत्मा क बीच तालमेल बिठाणा की वैज्ञानिक पद्धति च।

मुख्यमंत्रिन बोलि कि अज्कालै बगत मा तनाव अर सिहत का बीच योग स्वस्थ अर संतुलित जीवन जीणा कु एक जरिया बणिग्ये। उन्न ज्वानु से सदनि योग करणा कु अर कसरत तैं अपणि जिन्दगि कु हिस्सा बणौंणा की विनति कायी अर बोलिकि स्वस्थ, तागत वला अर अनुशासित युवा हि प्रदेस अर देसा कु भवेष्य छन। मुख्यमंत्रिन बोलिकि प्रदेस सरकार उत्तराखण्ड तैं योग, आयुर्वेद, वेलनेस अर प्राकृतिक चिकित्सा कु वैश्विक केंद्र का रूपम बणौंणा कु काम करणि च। नै योग नीति क जरिया योग अर ध्यान केंन्द्र, योग प्रशिक्षकु की मदत अर योग अर वेलनेस रूजगार का मौका खोजे जाणा छन।

मुख्यमंत्रिन सबि प्रदेसा रैवासियों से हरेक दिन योग करणा, स्वस्थ अर अनुशासित जीवनशैली अपणौंणा, नसा से दूर रैंणा की अर समाज मा अपणि जिम्मेबरि अर योग कु रैबार लोगु तक पौंछणु की सौं लिंणा विनती कायी अर योग कु रैबार लोगु तक पौंछाण की सौं लिंण की विनति कायी। उन्न बोलिकि मितैं विस्वास च कि प्रदेस युवा स्वस्थ्य अर कटकुटु उत्तराखण्ड बणौंणा वास्ता पूरि मेनत कारला।

ऐ मौका फर कैबिनेट मंत्री मदन कौशिक, विधायक विनोद चमोली, मेयर देहरादून सौरभ थपलियाल, सचिव आयुष श्रीमती रंजना राजगुरु, जिलाधिकारी देहरादून डॉ. आशीष चौहान अर वरिष्ठ पुलिस अधीक्षक परमेंद्र डोभाल बि छायीं।