क्या घपला करण वलों तैं जेल पौंछाण कु काम कारली सरकार : गरिमा दसौनी
देरादूण। प्रधानमंत्री सिचैं योजना मा हूयां करोड़ रुप्यौं कु घोटालापर आज कांग्रेसन सरकार अर कृषि मंत्री पर हमला बोलि। कांग्रेस भवन मा उर्यीं पत्रकार वार्ता मा कांग्रेस न प्रवक्ता गरिमा दसौनी न बोलि कि ऐ मामला मा जांच हूंण चैंद अर जिमदरु कु हक लुछण वला समणि आण चैंद।
गरिमा दसौनी न बोलि कि प्रदेस मा सैद यु पैलि इन्नु घपला च जैमा म्वरयां अर अनपढ़ जिमदरु का जाळि दस्कत कैकि योजना कु पैंसा विभागा अधिकारी अर काम करणि कम्पनी खै ग्यायी। उन्न बोलि घपला करण वलों की कैन मदत कायी, यु सबि जनता क बीच मा आण चैंद।
गरिमा दसौनी न बोलि कि धामी सरकार चुप किलै च। ऐ मामला मा कृषि मंत्री कु गिच्चि बन्द किलै च। उन्न बोलि मामला कृषि विभाग से जुड़यूं च अर कृषि मंत्री क विधानसभा तोका कु च इल्लै कृषि मंत्री तैं इस्तीफा देंण चैंद।
गरिमा दसौनी च बोलि कि ऐ मामला मा मुख्यमंत्री तैं समणि आण चैंद अर घपला करण वलों क मदत करण वलों पर कारवै कैकि उंथैं जेल भ्यजण चैंद।
बतै दियां कि सूचना अधिकारी मा प्रधानमंत्री सिचैं योजना म फर्जी वाड़ा कु खुलासा ह्वै। जैका बाद कांग्रेस प्रवक्ता गरिमा दसौनी आज ऐ प्रेस वार्ता कायी अर आरोप लग्यें कि जौन जिमदरु न क्वीं आवेदन तक नीं कायी, ऊंका नौं पर बि सवा लाख रुप्या निकले ग्यीं।
गरिमा दसौनी न बोलि कि घपला करण वला क खिलाफ सबि सबुत छन, अब एक मामला मा सरकार क्या कारवै करद यु त सरकार पर च पर या बात त साफ च कि बडु घोटाला विभागीय अधिकारी अर कार्यदाई संस्थान कायी। उन्न बोलि कि सरकार जीरा टॉलसेंस क बात करणि वलि सरकार की पूरि पोल घपला करण वलों न खोलि द्यायी।