शिक्षा कु मंदिरम, लड़ै-झगड़ा आखिर कोच जिम्मेबार . . .
देरादूण जैतैं देवभूमि की शांत अर सभ्य पछ्यांण वास्ता जणै जांद। यीं भूमिम पढै़ करण वला नौना की लड़ै-झगडे़ घटना चिंता पैदा करणि छन। प्रेमनगरम एक यूनविर्सिटी से जुड़या छात्रु की द्वी टोलि कु झगड़ा बीच इंजीनियरिंग की पढ़ै करणु वला एक नौनु कु स्वगबास ह्वेग्ये।
या सिरफ एक घटना नीं च, बल या हमर शिक्षा तंत्र अर समाजिक रैण-सैंण पर सवाल खड़ा करिण च। उन्न त या घटना देरादूण प्रेमनगर वास्ता क्वीं नै घटना नीं च। या से पैलि बि 9 दिसम्बर खुणि त्रिपुरा छात्र एंजल चकमा की कतल ह्वे छायी।
देरादूण आज देरादूण शिक्षा क्षेत्रम च खुब नौ कमाणु च। पर जब छात्रु बीच लड़ै जन्न खबर सुणै दिंद त बौत दुख हूंद। किलैकि द्वी छात्रु टोलि म बीच लड़ै अर यीं लड़ै मा एक छात्रै की मौत सिरफ वीं कुटुम्दरि हि ना बल सर्या समाज खुणि चिंता बात च। प्रेमनगर क्षेत्रम इन्नि घटना पैलि बि समणि ऐन। इन्न मा बडु सवाल च कि आखिर इन्नु किलै हूंण च आखिर हम कख गलती करणा छा?
शिक्षाका मंदिरम इन्न घटना सबसे पैलि कानून बन्दुबस्त पर सवाल खड़ा करदि कि आखिर एक हि जगम इन्न घटना किलै हूंणि छन। साफ च की अराजक तत्व जु छन, यु तैं कैकि डौर नीं च, अर वु तैं रोकणम प्रशासन फेल ह्वेग्यायी।
दूसर तरप शैक्षिण संस्थान बि जिम्मेबार च, कि क्या संस्थान सिरप डिग्री देंण क काम करणा छन या वुथैं एक जिम्मेबार नागरिक बणौंणा म अपडु योगदान बि दिंणा छन? यीं युवा हमर देसा भविष्य छन। अर यीं इन्नि छ्वटि-म्वटि घटना फर लड़ै झगड़ा करणा राला त, या हमर समाज वास्ता बौत चिंतै बात च।
सोशल मीडिया अर सबसे जादा पिक्चर बि यांका वास्ता जिम्मेदार छन। सोशल मीडिया, पिकचर डिजिटल कंटेंट जख जाणकारी का साधन छन त दूर तरप यु मा दिखेंण वलि गुस्सा अर हिंसा अर झट फैसला करण की आदत यु बच्चों का ब्यौहार तैं दिख्येंणि हि नीं च ऊतैं जादा बढ़ावा भि देंणि च। दबाव अर गलत संगत कु असर बि युंका ब्यौहार (व्यवहार) मा दिख्येंणु च।
इन्नि घटना तैं रोकणा वास्ता हमतैं जिन्दगि मा शिक्षा हि ना बल यांका दगड़ि नैतिक मूल्य, संवाद बारम बि सिखौंण जरुरी च। अब यु इस्कुल्यां नौना तैं बि समझण प्वाड़लु कि यीं उमरिम मतभेद त हूंणा हि रैंदन पर यां कु यु हल लड़ै कतै नीं च, बातचीत हि यांकु हल च। इन्नि घटनों तैं रोकणा वास्ता हमतैं कठोर कदम उठौंण प्वाड़ला। सबसे पैलि सुरक्षा बन्दुबस्त तैं हौरि कटकुटु करण प्वाड़लु। लगातार पुलिस तैं अपड़ि डौर बणैकि रखण प्वाड़लि, सीसीटीवी कैमरा अर दोषी फर झट कारवै करण प्वाड़लि। अर जु बि अराजक तत्व छन वु फर रोक लगौंणि प्वाड़लि। त दूसर तरफा विश्वविद्यालय तैं बि विश्वविद्यालय भितर अनुशासत तैं हौरि कटकुट करण प्वाड़लु। कांउसलिंग, जागरुकता अभियान, संवाद, तनाव अर छेड़ि कम करणा वास्ता मदद करण कोसिस करण प्वाड़लि।
बच्चों का ब्वे-बुबा तैं बि अपड़ा बच्चों का बरतौं, संगत अर मानसिक स्थित पर ध्यान देंण प्वाड़लु। समाज तैं इन्नि घटना तैं रोकणा वास्ता अच्छु वातावरण बणौंण प्वाड़लु।
यांका दगड़ि सरकार तैं बि चैंद कि इन्न घटना तैं इन्नि घटना तैं झटाझट जांच कैकि जु बि दोषि छन वु तैं कठोर से कठोर सजा देंण प्वाड़लि। कॉलेजम खेल, कौशल विकास अर हौरि गतिविधयों तैं बि बढ़ाण देंण प्वाड़लु, जैसे बच्चों की ध्यान सै दिसा मा लग्यूं रालु।
प्रेमनगर घटना सिरफ एक घटना नीं च बल या हम खूंणि एक चेतावनी बि च कि बगत पर क्वीं कारवै नीं करला त हमरा शैक्षिणि संस्थान बि सुरक्षित नी राला। अपड़ा भवेश्य सुरक्षित रखणा वास्ता हम सब्यों तैं मिलि जुलिकि काम करण प्वाड़लु जनकिकै देवभूमि देरादूण शांत पछ्याण बणि रैयां अर यख पढ़ै करण वला युवा लड़ै-झगड़ा न बल ज्ञान अर संस्कार लेकैकि अगनै बढ़िकि खुब नौ कमैयां।