अंकिता कु कतल क मामलु मा प्रेमचन्द्र अग्रवाल क क्या काम छायीं ? यांकी जांच हूंणि चैन्दन: यूकेडी
देरादूण। उत्तराखण्ड क्रांति दल न अंकिता कु कतल क मामलु मा कैबिनेट मंत्री प्रेमचन्द अग्रवाल भि मिल्यूं च, यु आरोप लग्यें अर सरकार से बोल कि यांकी जांच हूंणि चैंद।
यूकेडी ने शिव प्रसाद सेमवालन बोलि कि विधानसभा सत्र मा कैबिनेट मंत्री प्रेमचन्द अग्रवाल न जु बोलि वा प्रदेस क निखणि (दुर्भाग्य) च अर दोषियों थैं बचौंणा कु काम च। उन्न बोलि या से यु पता चलदु कि ऐ कतल मा मामला मा प्रेमचन्द्र अग्रवाल भि मिल्यां छन।
प्रेमचन्द्र अग्रवालन विधानसभा सत्र मा बोलि छायीं कि ऐ मामलु मा क्वीं वीआईपी मैमान नीं च, उन्न बोलि कि रिजॉर्ट मा क्वीं वीआईपी मैमान नीं छायीं बल्कि रिजॉर्ट क उबरौं थैं वीआईपी ब्वलें जान्द।
सेमवालन बोलि कि वु वीआईपी कै मैमान थैं न बल्कि उबरौं थैं ब्वना छन त। त उथैं यु भि बतौंण चैंद कि एक्स्ट्रा सर्विस क मांग कै खूंणि कर्यें जाणी छायीं।
यूकेडी न केन्द्रीय महामंत्री सुनील ध्यानी न बोलि कि अंकिता कु कतल मा जु दोषि छन वैकु बुबा अर भै भाजपा क राज्यमंत्री छायीं, इल्लै सरकार ऊंका दबौं मा च अर प्रेमचन्द्र अग्रवाल ऊंथैं बचौंणा छन।
वखि शिवप्रसाद सेमवालन बोलि कि प्रेमचन्द्र अग्रवाल कैलि यु ब्वना छन। उन्न बोलि कि न त वु यमकेश्वर क नेता छन अर न वु गृहमंत्री छन, इन्न मा आखिर उ इन्नु कैकु ब्वन ब्वना छन।
उन्न बोलि कि हमरि या निखणि च कि प्रेमचन्द्र दोषियों थैं बचौंणा छन अर अंकिता क कुटुम्दरि खूंणि अपड़ा गुच्च बटि द्वी बोल भि नीं बोलि सकणा छन।
उन्न बोलि कि सवाल त यौं भि च बल क्या एसआईटी न सरकार थैं अपड़ि रिपोर्ट देयाली? अबि जांच चलणि च इन्न मा मंत्री कैनकैकि जा जांच थैं भटकौंणा खूंणि इन्न बयान देंणा छन। ऐ मामला मा उन्न सरकार से मंत्री क जांच करणा क मांग भि कै।