सबास टीम इण्डिया . . .

एकदा दुबरा क्रिकेट विश्वकप हमर हत्थु बटि निकळि ग्यें। क्रिकेट एक खेल च अर खेल मा हार-जीत त लगि रैन्द। ऐसु विश्वकप मा भारत क टीम न बौत अच्छु खेल सेमी फैनल तक दिखै। इल्लै सर्या देस तैं या उमेद छायीं कि ऐसु विश्वकप हम हि जितला। पर 44 दिन, 47 मैच क बाद विश्वकप फैनल मा पांच बार चैंपियन आस्ट्रेलिया न टीम इण्डिया तैं हरै कि विश्वकप जीति। यीं हार न भारत कु तिसरदा विश्व कप जितणा कु सुपिन टुटिग्यें अर भारत तैं 2003 विश्वकप याद दिलें दे। जख आस्ट्रेलिया न भारत तैं 125 रन से हरै छायीं।

ऐसु क विश्वकप मा भारत 241 रन कु लक्ष्य आस्ट्रेलिया तैं दे छायीं। जै थैं आस्ट्रेलिया न 43 ओबर म चार विकेट पर पूरु कै दे। आस्ट्रेलिया विश्वकप जीतिग्यें अर भारता विश्वकप जितण की 12 साला जग्वाल हौरि लम्बु ह्वैग्यें। विश्वकप मा 2023 सा फैनल मा रोहित क पलटन मैच नीं जीति साकी, हार बाद सबि खिल्वार क मुखड़ि झुरयीं छन। पर यांक बाद बि सर्या देस तैं रोहित टोलि पर गर्व च।

रोहित क कप्तानी मा टीम इण्डिया विश्वकप 2023 मा सबि टीम पर गर्रि (भारी) छायीं। विश्वकप मा 10 बड़ी टीम जैमा पाकिस्तान, इंग्लैंड, साउथ अफ्रीका, ऑस्ट्रेलिया, श्रीलंका, न्यूजीलैंड जन्नि टीमु तैं हरौंण क्वीं छ्वटा नौन्याळु खेल नीं च। उन्न बि हार जी त खेल कु एक हिस्सा च जु खेल तैं खेल बणौंद।

फैनल ऑस्ट्रेलिया हमसे अच्छु खेलि, यांकु वैथैं इनाम बि मिलिग्यें पर विश्वकप कु मलतब च की कै टीम न सबसे अच्छु खेल खेलि।

बडु सवाल बि यौं च कि क्रिकेट विश्वकप 2023 मा क्वा टीम सबसे अच्छी छायीं? त सर्या विश्वकप मा भारत टीम से अच्छी क्वीं दूसरि टीम नी दिख्यें। 11 मैचु म बटि दस लगातार जीत अर वु बि एक तरफि। यांका बाद बि भारत नी जीति साकी त क्वीं झुरण वलि बात नीं च। किलैकि टीम इण्डिया न जु खेल विश्वकप मा दिख्यें वे से सर्या देसा तैं टीम पर फक्र च। आज सर्या देस टीम इण्डिया दगड़ च। भारत फैनल हारिग्यें पर टीम इण्डिया न अपड़ा खेलन सर्या देसा लोगु कु ज्यू जीति द्यायी। सबास टीम इण्डिया।