हमथैं त चीन क आंखौं मा खोट दिख्येंणि च : हरीश रावत

चीन स लगीं केर फर अगर छ्वीं संसद नी कारळी त कु कारळु? अर अगर कुछ छ्वीं थैं छिपौंण च तक सरकार विपक्ष के नेतौं से बात कै सकद, इन्न छ्वींयौंन नुकसान क्या हूंण वळु च। यु सरकार थैं देस थैं समझाणा चैंद। संसद मा छ्वीं ह्वैळी जैक बाद पक्ष अर विपक्ष सरकार क दगड़ मा खड़ा ह्वै सकदन। सर्या दुन्या मा अच्छु रैबार जालु, तब तुम कैळि संसद मा हूंण वळि छ्वींयों थैं घंगच्याट करण छौ। या बात प्रदेस क पैल्यक मुख्यमंत्री हरीश रावतन अपड़ा सोशल मीडिया मा बोलि।

हरीश रावतन अगले लेखि बल मि यु समझि नीं सकणु छौं कि जन्न बत्यें जाुण च कि चीन हमरि केर मा घुसि अर उंका हत्थु मा लुवा क डण्डा छायीं। उन्न हमरा सिपैयौं फर हमळा कै, जौकु अस्पताल मा इलाज हूंण च। हमरा वीर सैपियौं न चीना क सिपैयौं थैं वापिस भगे दे। इन्नु गलवान घाटी मा भि ह््वै छायीं, त इन्नि तवांग मा भि ह्वै। यु हमारा सिपैयौं क बहादूरी च पर चीन त झगड़ा करणौं खूंणि हि अयुं छायीं।

उन्न अगनैं लेखि कि अगर राहुल गांधी न या बात बोलि अर बोलि कि तुम किळै सियां छा। वु हमथैं झगड़ा करणा खूंणि छल्यौणु (उकसाना) च अर लड़ै खूंणि त्यार करणु च, इन्न लगणु च कि जन्न भाजपा फर अगास पौड़िग्यें।

तुमरा प्रवक्ता राहुल गांधी थैं देसद्रोही बतौंणा छन। कन्नु च? जब देस आजादी क लड़ै लड़णु छायीं, वै बगत तुम कैक दगड़ मा खड़ा छायीं, जब देस नै उमेद क दगड़ अगनैं बढ़णु छायीं तब तुम कख खड़ा छायीं?

जै पार्टी क नेतौंन देस क आजादी खूंणि अपड़ा ज्यू (प्राण) दे, देस क एकता खूंणि गांधी बटि इंदिरा गांधी, राजीव गांधी, कर्मा वेद सिंह, विद्याचरण शुक्ला अर कै नौ छन। इन्न मा तुम कांग्रेस पार्टी क नेतौंक देसभक्ति फर अंगुळा उठौंणा छा? शरम आणि चैंद तुमथैं। तुम चीना क दगड़ झूळा झुळि सकदो, झुळा। पर क्या तुमथैं इन्न लगणु च कि चीन हमरू सिपैयौं मा मालिस करौंण खूंणि ऐ छायीं, इन्ना तुमरा आंखा देखि सकदन। वु त झगड़ा करणा खूंणि हि ऐ छायीं, हमथैं त चीन क आंखा मा खोट दिख्येंणि च। हम त या बात बिना डर्यां ब्वना छा कि चीन क दगड़ लगि हमरि केर क सुरक्षा खतरा मा च।