विधानसभा भर्ति मा एक नै घुम, अब ऋतु खण्डूडी निसाणा पर

देरादूण। उत्तराखण्ड थैं झणि कैकि नजर लगिग्यें। घपरोल उत्तराखण्ड क पिछनै छ्वड़ना कु नौ नीं लिंणु च। पिछल द्वी विधानसभा मा पिछनै क द्वार बटि ह्वीं भर्ति थैं विधानसभा अध्यक्षा न खतम कै दे छायीं। जैमा गोविन्द सिंह कुंजवाला क कार्यकाल मा 158 अर प्रेमचन्द्र अग्रवाल के कार्यकाल मा 72 हवीं भर्ति थैं भैर कु बाटु दिख्यें छायीं। विधानसभा अध्यक्षा क ऐ फैसळक प्रदेस मा सब्यौं खुब तारिफ कै छायीं। पर अब विधानसभा भर्ति मा एक धुम (मोड) ऐग्यें।

सोशल मीडया मा एक चिट्ठी घुमणि च। चिट्ठी मा विधानसभा अध्यक्ष बणणा क बाद विधानसभा अध्यक्षान उत्तराखण्ड बटि भैर क मनखि थैं भर्ति का आदेश दियां छन।

सोशल मीडिया या चिट्ठी क्या घुमि बल विधानसभा मा ह्वीं भर्ति कु मामलु एक दा दुबरा चरचा मा ऐग्यें।

ऋतु खण्डुडी क कार्यकाल मा पत्रांक संख्या 198 /वि/स. अधि./22/2001, देरादून 19 अप्रैल 2022 क एक चिट्ठी वायरल हूंण च जैमा विशेष कार्य अधिकारी अशोक शाह नौनु स्व. डी एल शाह निवासी मकान नंबर 5 बी 11वी सी ब्लॉक जनकपुरी नई दिल्ली थैं माननीय विधानसभा अध्यक्षा क आदेशानुसार दिनांक 26 मार्च 2022 बटि तदर्थ भर्ति कर्यें ग्यें।

इन्न मा अब प्रदेस क राजनीति मा क्या हूंद यु त अबि भवैष्य क पुट्गा मा च पर अबरि त इन्न लगणु च कि उत्तराखण्ड क रैवासियों खूंणि नौकरि क द्वार बंद अर भैर वलों खूंणि पिछनै क द्वार सदनि खुला छन।

विधानसभा ऋतु खण्डुडी न विधानसभा मा पिछनै बटि ह्वीं भर्ति क मामला मा जन कारवै कै वे थैं देखिक त इन्न लगणु च बल अब ऋतु खण्डुडी क मुसिबत बढ़ाण वलि च। अर एकदा दुबर उत्तराखण्ड हो हल्ला ह्वालु ह्वै सकद।