विधानसभा भर्ति: विधानसभा अध्यक्ष ऋतु खंडुडी क बड़ी कर्वै, सचिव कु दप्तर कायी सील

देरादूण। उत्तराखण्ड विधानसभा मा ह्वीं भर्ति क मामला मा आज छन्चर खूंणि विधानसभा अध्यक्ष ऋतु खंडुडी न तीन सदस्य कमेटी बण्यें वाली अर जांच करणा क आदेश दे दीं।

विधानसभा अध्यक्ष ऋतु खंडूड़ी न बोलि मि औरि राजय क विधानसभा क बारा मा जाणकारी ले कैकि विधानसभा मा भर्ति कन कैकि कर्यें जन्दन अर कर्मचारियों क संख्या कन कैकि तय कर्यें जान्द।

विधानसभा अध्यक्ष आज विधानसभा मा पौंचि अर पैळि उन्न मुकेश सिंघल कु दप्तर थैं सील कर्यें। यांक बात उन्न एक प्रेस वार्ता कायी। विधानसभा अध्क्षन प्रेस वार्ता मा बोलि ऐ मामला मा हमन तीन सदस्य जांच समिति बण्यें याली। समिति एक मैना मा अपड़ि रिपोर्ट ऊंथैं दे देळि। उन्न बतै जब तक रिपोर्ट नि ऐ जाली तक कत सचिव थैं छुट्टी पर भेजि याली अर ऊंका दप्तर थैं सील कैरि याली।
उन्न बोलि जांच समिति क्वीं फैळ देय्खण चान्द त सचिव क दप्तर थैं खव्लें जालु।

खबर आणि च कि बल विधानसभा पूरणि नियमवली थैं छोड़िक, नै नियमावली मा ह्वीं भर्ति थैं खतम भि कर्ये जै सकद। उत्तराखण्ड विधानसभा मा अबि 400 से जादा अधिकारी अर कर्मचारी नौकरि पर छन। वखि खबर इन्न च आणि च बल विधानसभ मा अब कर्मचारियों के संख्या घटैकि 100 कर्यें जाली।

बतै दियां कुछ दिन पैळि उत्तराखण्ड विधानसभा मा पिछनै के द्वार बटि भर्ति क मामला समणि ऐ छायीं जैमा नेतावु अर ऊंकी कुटम्दरि थैं भर्ति कर्यें ग्यें।