विधान सभा मा पिछनै क द्वार बटि भर्ति, जनता थैं छकौणा (धोखा देना) कु काम नि त क्या च?

उत्तराखण्ड मा भर्ति घोटालों मा लगि आग अब यूकेएसएसएससी, पुलिस दरोगा भर्ति घोटाळों बटि विधानसभा मा ह्वीं भर्ति तक पौंचिग्यें।

यूकेएसएसएससी पेपर लीक मामला मा अबि जांच हूंणि च, ऐ बीच मा विधानसभा मा पिछनै क द्वार बटि ह्वीं भर्ति मामलों का छ्विंयों का चर्या सर्या प्रदेस मा चौछ्ड़ि हूंणि छन। एसटीएफ क जाचं मा या बात साफ ह्वैग्यें बल सरकारी नौकरी मा जू भि भर्ति ह्वीं, वै मा भ्रष्टाचार अर अपड़ा अपड़ौं थैं खुब नौकरी बट्यें ग्यें। अब जब या बात साफ ह्वैग्यें बल सत्ता मा क्वीं भि दल रै होळु , कांग्रेस ह्वै या बल भाजपा द्वीयों न नौकरियों मा खुब मजा ही न बल्कि नौकरी बेय्चाणा कु काम भि कैरि।

सोशल मीडियामा विधानसभा मा ह्वीं भर्ति क सूची वायरल हूंणि च। जैमा अपड़ा-अपड़ों थैं नौकरि दियें जाणा कु खुलासा हूंणू च। ऐ मामला मा जनि मुख्यमंत्री न जांच क बात बोलि उन्नि पैल्यक विधानसभा अध्यक्ष अप्फु थैं बचौंणा खूंणि समणि आणा बैट्ठिी ग्यीं। विशेषाधिकार अर इन्ना त पैलि बटि हूंणू च जन्न बयान दे कैकि अप्फ थैं बचाणा मा लगिग्यीं। यां मा सबसे उमचाण (परेशान) करण बलि बात या च हमरा माननीय कतगा पातर (बेशर्म) छन या बात समझा मा आणि च, अप्फु थैं बचाणा खूंणि एक दूसर थैं दोषि बताणा छन अर कटघरा मा खड़ा करणा छन या फिर इन्न त 2002 बटि हूंणू च जन्न बयान देंणा छन।

अब जब प्रदेस मा अधीनस्थ सेवा चयन आयोग सवालु क बीच फस्यूं च। इन्न मा प्रदेस क रैवासी आज स्वचणा खूंणि मजबूर छन कि 21 साल मा हमरू ‘अपडु उत्तराखण्ड’ आज कख मा खडु़ च? 21 सालु मा आज हम भर्ति घोटाळा क खोखली बुनियाद मा खड़ा छौं। प्रदेस मा रुप्यौंन नालायकों थैं सरकारि नौकरी बच्यें ग्यीं / दियें ग्यें। कैल विशेषाधिकार के नौ पर, त कैल एक चिट्ठी पर अपड़ा-अपड़ो थैं नौकरि इन्न बट्टि जन्न प्रसाद बट्टे जान्द। आज प्रदेस विधानसभा मा क्या मंत्री, या विधायक सब्यौं क नाता रिस्तदार सरकरि जवैंई बणिक खुब मजा करणा छन।

इन्न मा बडु सवाल यौं च बल विशेषाधिकार कु मतबल सिफर अर सिफर अपड़ा-अपड़ों थैं नौकरि मा खप्योड च? क्या यू उत्तराखण्ड क बेराजगार ज्वान अर प्रदेस के रैवासियों थैं छकौणा (धोखा देना) कु काम नि च? इन्न मा सबसे पैळि यू भर्तियों क जांच जरुरि च, तबि दूध कु दूध अर पाणि कु पाणि ह्वै सकद।