घूस लिन्दा पटवारी कु वीडिया ह्वे वायरल

देरादूण। सोशल मीडिया मा एक वीडिया वायरल हूंण च। वीडिया मा दिख्येणु च पटवारी दसकत (हस्ताक्षर) करणा क पैसा मंगणु च।

वीडिया कालसी तहसील कु बतै जाणु च। ऐ बारा अब मा एसडीएम न जांचा आदेश दे दी। वखि वीडिया बणौंण वला तैं लिखित सिकैत देंणा खूणि ब्वले ग्यायी।

वायरल वीडिया मा साफ दिख्येणु च कि एक आदिम कुछ कागजु मा पटवारी क दसकत करौंणा ब्वनु च।
आदिम पटवारी तैं ब्वनु च साब दसकत पर टप्पा लगै द्यो। पटवारी न बोलि कि टप्पा लगौंण म्यारू काम च पर खरचा पाणि लगलु। आदिम पटवारी तैं 500 सौ रुप्या कु नोट दिन्द पर पटवारी ब्वलद कि द्वी हरि पत्ती लगलि। आदिम ब्वलद की बड़ी मुसकिल से यु जुगाड़ ह्वे। अब घौर जाणा क पैसा बि नी छन।

आदिम ब्वदु क टप्पा लगौंणा बाद कुछ मिलदु च की नी मिलदु। पटवारी ब्वलद मि ब्वनु छौ कि मिलालु। पटवारी ब्वलद या से काम नी हूंण 500 रुप्या हौरि द्यो। वीडिया मा पटवारी क हाथ मा 500 रुप्या कु नोट दिख्येणु च।

एक मामला मा अब कालसी एसडीएम न बतै कि वायरल वीडियो कु मामला पता चलि। उन्न बतै कि पटवारी क खिलाप जांचा आदेश दे दियेग्यीं। त वखि वीडिया बणौंण वला मनखि तैं लिखित सिकैत देंणा खूणि बि ब्वलें ग्यायी।