केदारबाबा क जातरा सजिलु ह्वै जाली, बण्यें जाला द्वी रोपवे

देरादूण। केदारनाथ मा पैदल बाटु जातरियों खूंणि सबसे जादा सबसे जादा कठिण च। आपदा से पैलि यु पैदळ बाटु 14 किलोमीटर छायीं अर आपदा क बाद नै बाटु 21 किलोमीटर पैदल ह्वैग्यें।

ऐ वु कारण छन कि सरकारन केदारनाथ धाम मा द्वी रोपवे बणौंणा क त्यारि कैरि याली। पैळु रोपवे सोनप्रयाग बटि रामबाड़ा अर दुसरु रामबाड़ा बटि केदारनाथ तक जालु। राष्ट्रीय वन्यजीव बोर्डन रोपवे खूंणि अपड़ि मंजूरि देयाली। जै का बाद अब या उमेद ह्वैग्ये कि रोपवे कु काम जल्दी सुरू ह्वै जालु।

अबि गौरीकुण्ड बटि केदारनाथ धाम तक पैदल कम से कम 8 घण्टा अर ध्वाड़ा , खच्चर मा 3 से 4 घंटा लगदन। लेकिन ब्वलें जाणु कि रोपवे बणणा क बाद जातरि 30 मिनट मा बाबा क धाम मा पौंचि जाला। केदारबाबा क जातरा सजिलु अर आसान ह्वै जाली।