उत्तराखण्ड स्टिंग प्रकरण : हरीश रावत न सोशल मीडिया मा एक पोस्ट डालिकि भुबराणि आग मा घी डाळिकि औरि पिलचे दे

देरादूण। उत्तराखण्ड स्टिंग प्रकरण पर सीबीआई क जांच से प्रदेसा मा राजीतिक उथल-पुथल ह्वैग्यें। आज जन्नि सीबीआई कोर्ट बटि हरीश रावत अर हरक सिंह रावत तक अवाजै नमूना देंणा कु नोटिस जारी कायीं। त दुसर तरफि हरीश रावत न सोशल मीडिया मा एक पोस्ट डालिकि ऐ मामला मा भुबराणि आग मा घी डाळिकि औरि पिलचे दे।

हरीश रावतन सोशल मीडिया मा लेखिकि स्टिंगकर्ता न कुछ छेड़छाड़ भी कायी, वै स्टिंग क अलग-अलग भाग तैं मि द्वी दिन बाद अपड़ा फेस बुक पेज मा बतौंलु।

उन्न लेखि कि स्टिंगकर्ता ब्वनु च कि एक आदिम जु प्रदेसा मुख्यमंत्री छायीं जैका दगड़ मा हिमालय पुत्रा कु नौनु हूंणा कु संजोग जुड्यूं च, स्टिंग क पिछने ऊंकु हथ च। पैंसौं कु लेनदेन ह्वै, कतगा ह्वै यु मिथैं पता नीं च अर वु यु बि ब्वलद कि यु सबि वै मनखि क नौनु , जु सांसद कु चुनौं बि लैड़ि वै थैं करण। अर वु यु बि ब्वलद कि वु आदिम मुख्यमंत्री क घौर मा एक सेटर कु काम, सेटर कु मतबल दलाल, एक बडु दलाल कु काम करणु छायीं अर यीं बाति तैं बि ब्वलद बल इल्लै हि उबरिका मुख्यमंत्री तैं अपडु पद छ्वणन प्वाड़ या हट्यें ग्यें।

हरीश रावतन लेखि की सीबीआई जु इतगा खतरनाक बात कु स्टिंग करदु वैकु कुछ नीं करदि।
स्टिंगकर्ता दल बदल कु जै आदिम तैं कर्ताधर्ता बतौंणु च , ब्वनु च कि पैंसौं कु लेन-देन ह्वै वै मनखि तैं सीबीआई ऐ मामला मा सह अभियुक्त नीं बण्यें। जबकि हूंण चैंद छायीं कि बुबा भी अर नौनु बि, या मा सामिल हूंदा। जै से सेटर क रुपा मा उन्न कतगा दलाली कै, या बात समणि ऐ जान्दि, देस तैं पता लचण चैंद कि कन्ना मुख्यमंत्री छायीं अर कन्न उंका नौंना छन।

मगर वाह सीबीआई , एक मनिख जैक समणि सरकार बचौंणा कु कर्तव्य छायीं, वैथैं तुम मुजरिम बण्यें की बाय हुक एंड क्रुक बुक करण चाणा छन अर वैक ब्वन फर करण चाणा छन जै आदिम तैं तुम स्टिंगकर्ता बतै कि अपड़ु काम करणा छा अर वीं स्टिंगकर्ता जै आदिम तैं यांकु कर्ताधर्ता बतौंणु च अर ऐ पूरु मामला मा दल-बदल पैंसौं कु लेनदेन, जै फर आरोल लग्यूं लगणु च कि मुख्यमंत्री क घौर दलाली कु अड्डा बण्यूं च, वै फर सीबीआई चुप ही न बल भाजपा बि चुप्प च।

वे आदिम तैं तुमन अपड़ि पार्टी मा बडु नेता बण्यूं च। सेटर, दलबदल, करण वळु , पैंसौं कु लेनदेन करण वलु ‘बकौल स्टिंग कर्ता भाजपा क बड़ा नेता मा सामिल च।

मि स्टिंगकर्ता क छेड़छाड़ वलु स्टिंगा कु वै हिस्सा तैं तुमर समणि ल्योलु, अबि तुम स्वाचा, कि कना -कना लोग छायीं जु कांग्रेस क सरकार तैं गिरौंणा खूंणि उत्तराखण्ड क लोकतांत्रिक इतिहास पर कलंक लगौंणा मा सामिल छायीं। अर वु ळोगन मुख्यमंत्री क घौर तैं दलाली कु अड्डा बण्यूं छायीं, वाह भाजपा! वाह सीबीआई!

अगनै उन्न लेखिकि ऐ मामला मा श्री-श्री श्री विजयवर्गीय कु नौं बि ऐ! यु इन्न नौं च बल जु बि यु देरादूण अर वैका इन्नै-फुन्नै दिख्यें , त समझा कि उत्तराखण्ड क मुण्ड मा क्वीं बिपति आन्दि हि आन्दि च।