मुख्यमंत्री धामी न उत्तराखण्ड राज्य वन्यजीव बोर्ड बैठक मा कायी अध्यक्षता अर बोलि गूंणि, बान्दर, सुंगरा दिकदरि तैं दूर कर्यें ज्यां

देरादूण। मुख्यमंत्री धामी न आज सचिवालय मा उत्तराखण्ड राज्य वन्यजीव बोर्डा 19 वीं बैठक मा अध्यक्षता कायी अर गूंणि, बान्दर अर सुंगरु क दिकदरि तैं दूर करणा फर काम करणा क निर्देश दीं।

मुख्यमंत्रीन मानव वन्यजीव संघर्ष राहत राशि तैं बटणा कु बन्दबस्त 15 दिन क भितर करणा क निर्देश दीं अर बोलि कि जंगळी जानवरु क हमला मा टुणपट हूंया मनखि क मदत तैं 4 लाख रुप्यौं से बढ़ैकि 6 लाख रुप्यौं करण कु प्रस्ताव तैं कैबिनेट मा ल्यें जालु।

मुख्यमंत्री न बाघु क संख्या मा उत्तराखण्ड तैं तिसरी जगा मा औंणा फर बधै दे अर बोलि कि यां खूंणि यखक लोग बधै क पात्र छन। उन्न बोलि बल प्रदेसा क्षेत्रफल तैं देखिकि या बौत बड़ी उपलब्धि च। उन्न बोलि बल वाइल्ड लाइफ टूूरिज्म तैं देखिकि यांकु खुब प्रचार कर्यें ज्यां। मुख्यमंत्री न बोलि कि टाइगर प्रोटेक्शन फोर्स बणें कि ज्वानु नौनो तैं ज्वड़ें ज्या अर ळोगु तैं जादा से जादा जागरुक कर्यें ज्यां।

बैठक मा कैबिनेट मंत्री सुबोध उनियाल, विधायक श्रीमती रेनू बिष्ट, राम सिंह कैड़ा, मुख्य सचिव डॉ. एस.एस.संधु, डीजीपी अशोक कुमार, प्रमुख सचिव आर के सुधांशु, प्रमुख वन संरक्षक अनूप मलिक अर राज्य वन्य जीव बोर्ड क सदस्य मौजूद छायीं।