उत्तराखण्ड राज्य आंदोलनकारियोंन कायी प्रदेसा मा भू -कानून अर मूल निवास 1950 लागू करण क मांग

देरादूण। आज देरादूणा सड़कियों मा उत्तराखण्ड राज्य आंदोलनकारियों कु गुस्सा दिख्यें। उत्तराखण्ड राज्य आन्दोलनकारी मंच झण्डा क ताल प्रदेस मा भू-कानून न अर मूल निवास 1950 लागू कर्यें जाण क मांग तै लेकैकि प्रदेसा बौत सर्या सगंठनु न मुख्यमंत्री क आवास कूच कायी। पुलिसन आन्दोलनकारियों तैं हाथीबड़कला मा बैरिकेटिंग लग्यें की रोकि दे।

बतै दियां कि उत्तराखण्ड राज्य आन्दोलनकारी मंच न प्रदेसा सबि संगठनु से प्रदेसा मा भू-कानून न अर मूल निवास 1950 लागू करणा क मांग खूंणि मुख्यमंत्री आवास कूच करण क विनति कर्यीं छायीं। मुख्यमंत्री कूच मा आज उत्तराखण्ड राज्य आन्दोलनकारी मंच तैं यूकेडी, आम आदमी पार्टी , उत्तराखण्ड बेरोजगार संघ कु दगडु मिल्यूं छायीं।

आज सुबेर उत्तराखण्ड राज्य आंदोलनकारी मंच क झण्डा ताल सबि परेड गिरौंण्ड मा जमा हूयां छायीं। सबसे पैलि अपणि मांग तैं लेकैकि एक बैठक कर्यें ग्यायी। जैका बाद सबि प्रदर्शनकारियों न मुख्यमंत्री आवास कूच कायी। पुलिसन प्रदर्शनकारियौं तैं हाथीबड़कला मा बैरिकेटिंग लग्यें की रोकि दे। जैका बाद प्रदर्शनकारियों वखिम बैठिग्यीं।

उत्तराखण्ड राज्य आंदोलनकारी मंच क प्रदेस महासचिव रामलाल खंडूडी न बोलि कि उत्तराखण्ड देस कु पैळु प्रदेस च जख क्वीं भू कानून नीं च, इन्न मा प्रदेस मा कटकुटु भू काननू बण्यें जाण चैंद। उन्न बोलि कि प्रदेसा मा क्वीं भू कानून नीं च यां से खतरा ह्वैग्यें अर भैर ळोगु तैं उत्तराखण्ड जमीन तैं उत्तराखण्ड क रैवासियों से लुच्छणा कु मौका मिलिग्यें। उन्न बोलि उत्तराखण्ड क रैवासियौं क जमीन भैर क बड़ा-बड़ा पूंजीपति अर भू माफिया क हत्थु मा जाणि च। हमरु बोण, हमरु पाणि अर हमरि जमीनु फर भैरा ळोगुकु कब्जा हूंदै जाणु च।

राज्य आन्दोलनकारियों न सरकार तैं खबरदार कायी कि प्रेदस मा भू-कानून अर मूल निवास 1950 जल्दी लागू नीं कर्ये जालु फिर बडु़ आन्दोलन कर्यें जालु।