उत्तराखण्ड राज्य आन्दोळनकारियों न राजभवन कायी कूच

देरादूण। उत्तराखण्ड राज्य आन्दोळनकारियों न आज अपड़ि मांग थैं लेकैकि राजभवन कूच कायी। उत्तराखण्ड प्रदेश बण्यां 21 साळ ह्वैग्नीं अर आज भि राज्य आन्दोलन कारी सड़िक्यों मा अपडि मांग थैं लेकैकि संघर्ष करणा छन।

उत्तराखण्ड राज्य आन्दोलनकारी मंच क झण्डक ताळ आन्दोळनकारियों न आरक्षण विधेयक 2015 थैं मंजूर देंणा क वास्ता अर अपड़ि औरि मांगों थैं लेकैकि राजभवन कूच कायी। आन्दोलनकारियों थैं हाथीबड़कला मा पुलिस न बैरियर लग्यें कि रोक द्यायी। बैरिकेटिंग मा राज्य आन्दोळनकारियों धरना द्यायी अर सरकारक खिलाफ खूब नारा बाजी कायी।

https://youtu.be/NaFaqdyt8dQ

आन्दोळनकारियों न ब्वाळ कि 2015 बटि विधानसभा मा पारित राज्य आन्दोळनकारियों थैं 10 प्रतिशत क्षैतिज आरक्षण कू विधेयक अगैन कार्यवाही खूंणि राजभवन भैज्यें ग्यायी छायी। राजभवन मा यू मामळा कख दब्यूं च कै थैं नि पता। जै कारण आन्दोलनकारियों मा नाराजगी छायीं।

आन्दोळनकारियों न ब्वाळ कि 2004 मा एक आदेश ह्वै छायी जै से आन्दोळनकारियों थैं 10 प्रतिशत क्षैतिज आरक्षणळ नौकरी मिल्ली छायीं। जै थैं उच्च न्यायाळन इल्ले रोकि द्यायी कि ऐ पर प्रदेश सरकारन कुई कानून नि बण्यें साकी। आन्दोलनकारियों ब्वाळ कि आज छः साळ बाद भि 10 प्रतिशत क्षैतिज आरक्षण का मामळा राजभवन माा अटक्यूं च जै कारण राज्य आन्दोळनकारियां थैं नौकरी नि मिलणि च।

उन्न् मांग कायी कि ऐ आरक्षण विधेयक थैंं जल्दी से जल्दी मंंजूरी मिळण चैंद। राज्य आन्दोळनकारियों मा जगमोहन सिंह नेगी, प्रदीप कुकरेती, ओमी उनियाल, रविंद्र जुगरान, रामलाल खण्डूड़ी, विनोद असवाल, सुरेश कुमार, कमल सिंह गुसाईं, सुलोचना भट्ट, जयदीप सकलानी, वीरेंद्र पोखरियाल, जबर सिंह पावेल शामिळ छायी।