उत्तराखण्ड प्रदेस कांग्रेस, अब प्रदेस प्रभारी देवेन्द्र यादव थैं हटौंणा क ह्वै मांग

देरादूण। कांग्रेस पार्टी भितर सबि कुछ ठीक नी च, पार्टी मा एक दुसर थैं आंखा घुरौंणा, धधोड़ना, गुगरौण मा क्वीं पिछनै नी रैंण चाणु च। इन्न लगणु च कि कांग्रेस पार्टी कु क्वीं सैं-गुसैं नीं च।

या बात हम इल्लै ब्वना छा कि अब कांग्रेस एआईसीसी क पैल्यक सदस्य योगेन्द्र खंडुड़ी न पार्टी क राष्ट्रीय अध्यक्ष थैं चिट्ठी लेखि अर बोलि कि उत्तराखण्ड मा कांग्रेस क हलात बौत खराब छन अर प्रदेसा प्रदेस प्रभारी देवेन्द्र यादव थैं हटैं कि कै दुसरा थैं या जिम्मेबरि दियें ज्यां।

योगेन्द्र खंडुड़ी चिट्ठी मा लेखि कि उत्तराखण्ड मा कांग्रेस फरवरी 2022 मा हूयां विधानसभा चुनौं मा नीं जीत साकी। जबकि हिमाचल मा कांग्रेस चुनौं जीतीग्यें किलैकि वखक प्रदेस प्रभारी राजीव शुक्ला तजुर्बाकार अर उमर मा बड़ा छन। जै कारण सबि छ्वटा, बड़ा अर सबि नेतौंक दगड़ मिलिकि उ हिमाचल मा कु चुनौं जीतण मा सफल ह्वै।

दुसर तरफ उत्तराखण्ड मा कांग्रेस पार्टी भितर सबि कुछ ठीक नी च, पार्टी मा एक दुसर थैं आंखा घुरौंणा, धधोड़ना छन अर क्वीं उथैं रवक्ण वळु नीं च। जै कारण जनतै क आंखौं मा पार्टी अन्दवार नी आणि च अर पार्टी कु संगठन कटकुटु हूंण च।

उन्न बोलि कि प्रदेस मा पार्टी कु संगठन थैं कटकुटु बणौंणा खूंणि अर पार्टी क क्वीं भि दिकदारि थैं ठीक करणा कु काम प्रदेस प्रभारी कु हुन्द पर उत्तराखण्ड मा त ठी उल्टु हि हूंण च

एआईसीसी क पैल्यक सदस्य अर उत्तराखण्ड बाल संरक्षण आयोग क पैल्यक अध्यक्ष योगेन्द्र खंडुड़ी न पार्टी क राष्ट्रीय अध्यक्ष थैं चिट्ठी लेखि अर बोलि कि उत्तराखण्ड मा कांग्रेस क हलात खराब छन, प्रदेसा प्रदेस प्रभारी देवेन्द्र यादव थैं हटैं कि कै दुसरा थैं या जिम्मेबरि दियें ज्यां।

चिट्ठी मा खंडूडी न लेखि कि प्रदेस मा पार्टी क सबि कामु क जिम्मेबरि प्रदेस प्रभारी क हूंद अर यां खूंणि हि प्रदेस प्रभारी क बण्यें जन्दन। यु कारण च अब्यका प्रभारी से पैळि प्रदेस मा जादा बड़ा, तजुर्बाकार थैं या जिम्मेदरि दियें जाणि रै।

उन्न बोलि कि झट देवेन्द्र यादव थैं बदलि कैकि कै अर तजुर्बाकार थैं प्रदेस प्रभारी बण्यें ज्यां।