उत्तराखण्ड देवभूमि च, यख कु वातावरण उद्यमियौं खूंणि बौत अच्छु च : मुख्यमंत्री धामी

देरादूण। उत्तराखण्ड धामी ऐसु क साल आखिर म प्रदेस मा एक ग्लोबल इन्वेस्टर्स समिट 2023 उर्यांणु च। ग्लोबल इन्वेस्टर्स समिट 2023 क जाणकरि अर निवेशकु खूंणि प्रेदस सरकार काम करणि च। इन्न एक कार्यक्रम नै दिल्ली मा उर्यें, जख मुख्यमंत्री धामी न उद्यमियौं तैं सम्बोधित कायी, मुख्यमंत्री न बोलि समिट क जरिया ढाई लाख करोड़ रुप्यौं कु निवेश कु लक्ष्य धर्यूं च।

कार्यक्रम म आईटीसी न उत्तराखण्ड सरकार तैं 5000 करोड़ रुप्यौं कु निवेश कु प्रस्ताव दे। यांका दगड़ मा उत्तराखण्ड सरकार न महिंद्रा हॉलीडेज एंड रिजॉर्ट इंडिया लिमिटेडा दगड़ 1000 करोड़ रुप्या अर ई-कुबेर क दगड़ 1600 करोड़ रुप्यौं क निवेश कु एमओयू फर दसखत करिन।

ऐ मौका फर मुख्यमंत्री धामी न बोलि कि जब ऊंकी टोळा न फैसला कायी की वु उत्तराखण्ड मा एक ग्लोबल इन्वेस्टर्स समिट उर्याला। तब बटि क्वीं दिन इन्नु नीं च जब लोगुन ऊंकु मतंग (उत्साह) नी बढ़ै। मुख्यमंत्री न बोलि उत्तराखण्ड प्रदेस अबि ज्वान च अर उत्तराखण्ड खळाखल विकास करणु च। उन्न बोलि उत्तराखण्ड म उद्योग बौत सम्भौवना छन। राज्य म ईज ऑफ डूइंग बिजनेस क दगड़ा-दगड़ि पीस ऑफ डूइंग बिजनेस बि च।

मुख्यमंत्री न बोलि कि उत्तराखण्ड भारत कु मुकुट च अर धामु क धरति च। उन्न बोलि उत्तराखण्ड न यु तय कर्यूं च कि वु भारत क आर्थिक विकास मा अपणि सहभागिता देलु। उन्न बोलि उत्तराखण्ड मा जन्म लिंणु भग्वानै इच्छा च अर कर्म करण वलौं तैं बि या बात समझणि प्वाड़लि कि उं फर दय्बतौं क कृपा च। उन्न बोलि हमरि सरकार न मानसखण्ड तैं बणौंणा क सौं लियीं च अर सकार यीं दिसा मा काम करणि च। उन्न बोलि सर्या देस मा उत्तराखण्ड जनु क्वीं दूसर प्रदेस नीं च। उन्न सब्यौं से विनति कायी कि उत्तराखण्ड मा इन्वेस्टमेंट कर्यां।

मुख्यमंत्री न बोलि कि ऊंकी सरकारै कोसिस च औंण वला पांच सालु मा उत्तराखण्ड क जीडीपी तैं द्वी गुणा करणा कु च। मुख्यमंत्री न बोलि देवभूमि कु वातावरण उद्यमियौं खूंणि बौत अच्छु च।