यूकेडी न कायी प्रवक्ता भर्ति क जांच करणा क मांग

देरादूण। उत्तराखण्ड क्रांति दल न प्रवक्ता भर्ति क जांच एसआईटी से करौंणा क मांग मुख्यमंत्री धामी से कायी।

यूकेडी क नेता टीएस कार्की न बोलि कि एक हप्ता मा सरकार हमरि मांग पर कारवै नी करदि त बेरोजगारू क दगड़ मिळकि आन्दोलन कर्यें जाळु।

यूकेडी क केन्द्रीय मीडिया प्रभारी शिव प्रसाद सेमवाल न बोलि यूकेपीएससी जरिया कर्यीं अबि तकाकि भर्ति मा बटि तिन भर्तियौं मा एसआईटी ने मुकदमा दर्ज कर्यां छन पर प्रवक्ता भर्ति मा परचा बैचणां क बात समणि आणा के बाद भि क्वीं मुकदमा नीं ह्वै। उन्न बोलि कि यूकेपीएससी क अनुभाग अधिकारी संजीव चतुर्वेदी न पैळ हि बोळ याली कि प्रवक्ता भर्ति कु परचा 30 से 35 लाख रुप्यौं मा ब्यचें ग्यें छायी पर अबि तक यांका बारा मा क्वीं कारवै नी ह्वै। उन्न बोलि कि सहकारिता भर्ति घपरोळ क जांच मा बि तेज हूंण चैंद।

यूकेडी क केन्द्रीय प्रवक्ता अनुपम खत्री न बोलि कि अधीनस्थ सेवा चयन आयोग बटि यूकेपीएससी क इमत्यानु मा उत्तरकाशी क हाकम सिंह, खटीमा क साहनी अर हरद्वार क संजय धारीवाल भाजपा क छ्वटा नेतौं पर क्वीं कारवै नीं ह्वै। उन्न बोलि बल ऐ मामळु मा सबि बड़ा नेतौं का नौ भि समणि आण चैंद।

यूकेडी क केन्द्रीय प्रकोष्ठ क अध्यक्ष सुलोचना ईष्टवाल अर उपाध्यक्ष उत्तरा पंत बहुगुणा न बोलि पीसीएस क इमत्यान मा ब्यटुळों तैं 15 प्रतिशत आरक्षण कु कोटा तय कैकि पीसीएस क इमत्यान कर्यें जाण चैंद। उन्न बोलि कि नथर उत्तराखण्ड क ब्यटळों कु हक लुच्छें (छीना) जाळु।

यूकेडी क नेता राजेन्द्र पंत न बोलि कि पटवारी भर्ति इमत्यान 12 फरवरी खूंणि हूंणू च अबि तक नकल विरोधी कानून नी बणि। उन्न बोलि कि 10 फरवरी खूंणि हूंण विळ कैबिनेट बैठक मा नकल विरोधी कानून कु प्रस्ताव पास कैकि अध्यादेश लागू कर्यें ज्यां, जै से नकल करण वळों तैं दुबरा पटवारी भर्ति इमत्यान मा बैठणा कु मौका नी मिल्यां।

प्रेस वार्ता मा राजेंद्र प्रधान, संजय तितोरिया प्रदीप रावत, गौरव रावत, बीना थपलियाल, सरोज रावत, मंजू रावत, मधु सेमवाल, संजय डोभाल, अनिल डोभाल, मधु सेमवाल, राजेंद्र गोसाई, प्रमोद डोभाल, विनोद कोठियाल, रमा चौहान, राजेश्वरी रावत, उत्तम रावत, अशोक नेगी, सुनील ध्यानी, लताफत हुसैन, शक्ति लाल शाह, निशीथ मनराल, इसलाम, आफताब, सन्नो,कविता, प्रमोद काला छायीं।