भाजपा न दे गणेश जोशी तैं केर (मर्यादा) मा रैकि ब्वना क सलाह

देरादूण। पैल्यक प्रधानमंत्री इंदिरा गांधी अर राजीव गांधी पर बयान देकि कैबिनेट मंत्री गणेश जोशी कांग्रेस क निसाण मा छन। जै थैं लेकैकि भाजपा पिछनै क खुट्टौं मा खड़ी दिख्येंण च। गणेश जोशी क बयान पर भाजपा कु गुच्चु बन्द च पर भाजपा ऊथैं केर ( मर्यादा) मा रै कैकि बयान देंणा क सलाह देंणि च।

बतै दियां कि अबि कुछ दिन पैळि कैबिनेट मंत्री गणेश जोशी न पैल्यक प्रधानमंत्री इंदिरा गांधी अर राजीव गांधी तैं लेकैकि एक बयान दे छायीं। गणेश जोशी न बोलि छायीं कि इंदिरा गांधी अर राजीव गांधी क मौत क्वीं शहादत नी च बलकि एक घटना च। गणेश जोशी क यीं छ्वीं क बाद कांग्रेस न जोशी अर भाजपा पर निसाण साधी। जोशी क बयान फर भाजपा अपड़ा पिछनै क खुट्टौं पर खड़ी दिख्येंणि च अर जोशी तैं केर (मर्यादा) मा रै कैकि बयान देंणा क सलाह देंणि च।

त दुसर तरफ गणेश जोशी ब्वना छन कि उन्न जु बोलि वु सै च। अब ये मामळु मा भाजपा महामंत्री आदित्य कोठरी न कैबिनेट मंत्री गणेश जोशी तैं केर मा रै कि बयान देंणा क सलाह दे। आदित्य कोठारी न बोलि कि लोकतंत्र मा ब्वलण क आजादी सब्यौं तैं च पर यांकु मतबल यु नी च कि कै खूंणि कुछ बि ब्वलें ज्यां। उन्न बोलि कि हमथैं सगोर अर केर मा रैकी ब्वन चैंद।