प्रदेस प्रभारी दिल्ली मा बैठिकि उत्तराखण्ड कांग्रेस थैं चलाणा छन : प्रीतम सिंह

देरादूण। उत्तराखण्ड कांग्रेस मा एआईसीसी सूची समणि क्या ऐ कि कांग्रेस मा घमाचूर ह्वैग्यें।

कांग्रेसा नेता एक दुसरा तैं दोस दिंणा छन। प्रीतम सिंघा न सूची मा उत्तराखण्डा 5 विधायकु क नौ अर कै बड़ा कांग्रेसियौं तैं मौका नी मिलणा कु मुद्दा उठे त कांग्रेस प्रदेस अध्यक्ष करण महारा न उथैं उंका बगता सूची क समळोण दिलै अर बोलि कि वै बगत मा बि बड़ा बड़ा नेतौं तैं मौका नी मिळि छायीं।

प्रीतम करन माहरा पर कम अर प्रदेस प्रभारी देवेंद्र यादव पर जादा नराज छन। प्रीतमा न बोलि कि देवेन्द्र यादब दिल्ली मा बैठिकि उत्तराखण्ड कांग्रेस थैं चलौंण चाणा छन। उन्न बोलि कि प्रदेस प्रभारी इल्लै बण्यें जन्दिन कि वु प्रदेस मा रै कि मिळिकि काम कर्या। उन्न बोलि कि मिन त पैळु प्रभारी देखि जु पार्टी बणिक काम करणु च।

प्रीतम सिंघा न करण माहरा क सवाल पर बोलि मेरी सूची मा कैथैं मौका नी मिळि त नी मिळि पर वे बगत मा कैन बि सवाल खड़ा नी कायी। उन्न बोलि बात आजाक हंूणि च। उन्न बोलि कि मि प्रदेस अध्यक्षा कै बि बात क जवाब देंण नी चान्दु।