अपड़ों क झंगज्याट मा कांग्रेस

उत्तराखण्ड कांग्रेस मा सबि कुछ ठीक नी चलणु च, कांग्रेस चौतर्फ छ्वीं हूंणि छन किलैकि कांग्रेस पार्टीक भितर एक दुसरा क झुलड़ा थैं खिचणा क कोसिस ऐखारि-ऐखारि (बार-बार) हूंणि च , जै कारण भाजपा क मुखड़ि मा चलक्वार दिख्येणि च।

अबि कुछ दिन पैलि तिलकराज बेहड़ न गढ़वाल क उपेक्षा करणा कु आरोप लग्यें छायीं अर बोलि कि ये मामला मा हाईकमान थैं बीच मा ऐ की घुरचेंण (हस्तक्षेप) चैंद। व वखि प्रीतम सिंगन पार्टी प्रदेश प्रभारी पर हि सवाल खड़ा कै देन्न। प्रीतम सिंगन बोलि कि देवेन्द्र यादव तैं राजनीति कु क्वीं तजुर्बा नी, ऊथैं राजनीति कु क, ख, ग बि नी आन्दु। उन्न बोलि कि हाईकमान थैं क्वीं जिम्मेदार अर समझदार नेता थैं प्रदेश प्रभारी बणौंण चैंद। कांग्रेसा भितर बटि ब्वलें जाणु च कि जब बटि प्रीतम सिंह तैं अध्यक्ष पद अर नेता प्रतिपक्षा पद बटि हट्यें ग्यें तबि बटि वु रुस्यां छन। यीं वु कारण च वु प्रदेश प्रभारी से नराज छन अर कांग्रेस हाईकमान थैं अपड़ि बात बतौंणा छन। ब्वलें त इन्न बि जाणु क पार्टी मा खास कै कि एक तोक क ळोगु थैं जिम्मेबरि दियें जाण से नराजगी च। त दूसर तरफ करन माहरा जब बटि प्रदेश अध्यक्ष बणि तबि बटि कांग्रेसा एक गुट नराज च।

भाजपा क बड़ा नेतौं अजय भट्ट अर गणेश जोशी न तिलकराज बेहड़ क दगड़ मा भेंट क्या कायी कि ऐ बातिक सियासी मलबल ख्वजें जाण बैट्ठिग्यें। जैका बाद भाजपा क प्रदेश अध्यक्ष न आग मा घ्यूं डालि कि कांग्रेस क कुछ बड़ा नेता भाजपा नजीक छन अर कबि बि कुछ बडु दय्खण खूंणि मिलि सकदु।

यी वु कारण च कि कांग्रेसा घौर क लड़ै अब भैर चौबाटा मा ऐ ग्यायी। साफ च कि जन्नि-जन्नि गरम बढ़दा जाणु च राजनीति कु पारा बि चढ़दै जाणु च, बस अब दय्खण वलि बात या च कि यु सियासी पारा कतगा मत्थी तक जान्द।

जख भाजपा लोकसभा 2024 क तयारि करणा मा लगि च वखि कांगेस अपड़ा झगड़ों मा हि उलझि च। साफ च की कांग्रेस अपणि पिछळ गलतियौं से कुछ सिखणा खूंणि त्यार नीं च। इन्न मा लोकसभा चुनौं 2024 कांग्रेस खूंणि यु क्वीं शुभ संकेत त नी च। कांग्रेस थैं भैर वळों से न बल्कि अपड़ों से डैर च अर अर कांगेस अपड़ों क झंगज्याट बटि भैर नी ऐ सकणि च। यीं वु कारण च कि जनतै क नजर मा कांग्रेस न त अपड़ि पछ्याण मा क्वीं सुधार कै पाणी च अर न ही संगठन तैं कटकुट कै सकणि च।