केन्द्रीय स्वास्थ्य मंत्री अर मुख्यमंत्री धामीन कायी द्वी दिना कु स्वास्थ्य चिंतन शिविर कु शुभारम्भ

देरादूण। केन्द्रीय स्वास्थ्य मंत्री डॉ. मनसुख मांडविया अर मुख्यमंत्री धामीन देरादूणा एक होटल मा केन्द्रीय स्वास्थ्य अर परिवार कल्याण परिषद क 15 वु सम्मेलन कु शुभारम्भ कायी।

द्वी दिनाकु स्वास्थ्य चिंतन शिविर मा देसा सबि प्रदेसु अर केन्द्रसासित प्रदेसु क प्रतिनिधियौं न भाग ल्यायी। कार्यक्रम मा स्वास्थ्य क बारा मा लिखि किताबियौं कु विमोचन कर्यें ग्यें।

केन्द्रीय स्वास्थ्य मंत्री डॉ. मनसुख मांडविया न बोलि कि केन्द्रीय स्वास्थ्य अर परिवार कल्याण परिषदा या दूसरि इन्न बैठक च, जै थैं चिंतन बैठक कु स्वरूप दियेग्यें। उन्न बोलि कि कुछ पाणा खूंणि सब्यौं क दगड़ मा चिंतन अर मनन बौत जरूरी च। इन्न बोलि कि द्वी दिनक बैठक मा जु मंथन होलु अर वै से जु सुझौ मिलला, वु स्वास्थ्य क तोक मा भारत कु भवैष्य खूंणि बौत भलु होलु।

केन्द्रीय मंत्री न बोलि 2025 तक देस तैं क्षय रोग मुक्त बणौंण कु लक्ष्य धर्यूं च।

मुख्यमंत्री धामी न बोलि बल स्वास्थ्य चिंतन शिविर मा भाग लिंण वला मेमानु कु देवभूमि उत्तराखण्ड मा स्वागत च उन्न बोलि कि या हम खूंणि गर्व अर सम्मान क बाद च कि ऐसु क साल केन्द्र सरकारन उत्तराखण्ड तैं स्वास्थ्य चिंतन शिविर उर्यांणा कु मौका द्यायी।

मुख्यमंत्री न बोलि कि भारता का पूरणा ग्रंथ दुन्या तैं एक कुटुम्दरि क तरौं रैंण सिखौंन्दन। अच्छु शरैल खूंणि हमरु आंख्यिूं मा ‘ एक पृथ्वी, एक स्वास्थ्य’ च। उन्न बोलि कि केन्द्र सरकार उत्तराखण्ड सबि तोक मा बौत मदत करणि च। आज रोड क्नेक्टिविटी, इंफ्रास्ट्रक्चर, रोपवे सेवा या फिर अच्छी स्वास्थ्य सेवा सबि तोक मा केन्द्र अर प्रदेस सरकार मिलिकि सै काम करणि च।

स्वास्थ्य मंत्री डॉ. धन सिंह रावतन बोलि कि उत्तराण्ड मा हूंणू द्वी दिनकु स्वास्थ्य चिंतन शिविर मा स्वास्थ्य सुविधौं तैं औरि बढ़ौंणा देंणा दिसा मा चिंतन होलु।
उन्न बोलि कि प्रदेस मा स्वास्थ्य सुविधौं तैं बढ़ौंणा खूंणि जु बि जरूरत होलि, वै खूंणि केन्द्रीय स्वास्थ्य मंत्री डॉ. मनसुख मांडविया क पूरि मदत मिलि। चारधाम जातरा मा स्वास्थ्य सेवाऔं तैं अच्छु करणा खूंणि केन्द्र सरकार न राज्य सरकारा पूरि मदत कायी।

ऐ मौका फर सिक्किमा मुख्यमंत्री प्रेम सिंह तमांग, केन्द्रीय स्वास्थ्य राज्य मंत्री प्रो. एस.पी.सिंह बघेल, डॉ. भारती प्रवीण पंवार, उत्तराखण्डा स्वास्थ्य मंत्री डॉ. धन सिंह रावत, नीति आयोगा सदस्य डॉ. वी.के पॉल, सचिव स्वास्थ्य, भारत सरकार राजेश भूषण, राज्य अर केन्द्र शासित प्रदेशु का स्वास्थ्य मंत्री अर स्वास्थ्य सचिव छायीं।