उत्तराखण्ड क्रांति दळन कायी विधानसभा अध्यक्ष ऋतु खण्डूड़ी क विधायकी खतम करणा क मांग

देरादूण। यूकेडी न कोटद्वार बटि भाजपा विधायक अर विधानसभा अध्यक्ष ऋतु खण्डुडी क विधायकी खतम करणा क मांग थैं लेकैकि राज्य निर्वाचन आयुक्ता दगड़ मा भेंट कायी। यूकेडी न उंका जरिया मुख्य निर्वाचन अधिकारी उत्तराखण्ड अर भारत सरकार थैं ऋतु खण्डुडी क विधायकी खतम करणा ज्ञापन भेजि।

यूकेडी क केंद्रीय मीडिया प्रभारी शिव प्रसाद सेमवाल न ब्वाल कि विधानसभा अध्यक्ष अर कोटद्वार विधायक ऋतु खंडूडी न फरवरी 2022 उत्तराखंड विधानसभा चुनौं मा अपडु पता, जी- 305 सोम विहार आर के पुरम दिल्ली दे। उन्न बोलि कि ऋतु खंडूडी 28 जनवरी 2022 जै दिन कोटद्वार विधानसभा तोक बटि अपडु नामांकन भ्वौरि, उबरि वु उत्तराखण्ड हि न बल्कि नै दिल्ली आर. के. पुरमा क भि मतदाता छायीं। अर उंकु नौं उत्तराखंड मा 37 पौड़ी विधानसभा क्षेत्र क भाग संख्या 128 क क्रम संख्या 571 मा भि लख्यूं छायीं। उन्न बोलि कि ऋतु खण्डूड़ी अबि विधानसभा अध्यक्ष छन। उन्न बोलि कि उंकी विधायकी खतम हूंण चैंंद किलैकि उंकु नौं 1 जनवरी 2022 मा दिल्ली क वोटर लिस्ट मा भि छायीं अर उन्न उत्तराखण्ड क वोटर बणणा से पैळि अपड़ नौं दिल्ली वोटर लिस्ट बटि नीं हट्यें। जु गलत च अर वै फर कारवै हूंण चैंद।

यूकेडी व्यटुला मोर्चा क संगठन मंत्री मीना थपलियाल न बोलि कि कानूनी ब्वलद कि द्वी जगौं बटि वोटर हूंण फर एफआईआर दर्ज हूंण चैंद। द्वी जगों बटि मतदाता सूची मा नौं हूंण फर एक साळा क सजा अर डांड लग्यें जांद।
यूकेडी नेता विपिन रावत न निर्वाचन आयुक्त तैं बोलि कि यांकी भि जांच हूंण चैंद कि जब ऋतु खण्डूड़ी 1 जनवरी 2022 मा दिल्ली कि मतदाता छायीं तब वु 2017 मा कैनकैकि यमकेश्वर विधानसभा बटि चुनौं लैड़िक विधायक बणि।

यूकेडी पंकज उनियाल न बोलि यु बौत जादा गंभीर मामलु च। उन्न बोलि ऐ मामळा मा झट कारवै हूंण चैन्द।

यूकेडी न मांग कायी कि ऋतु खण्डूड़ी कु उत्तराखण्ड कु वोटर कार्ड थैं खतम कैकी उ फर कानूनी कारवै करयें जाण चैंद अर दगड़ा दगड़ि उंकी विधायकी खतम हूंण चैंद।

ऋतु खण्डूड़ी क विधायकी थैं खतम करणा क मांग थैं लेकैकि निर्वाचन आयोग जाण वळौं मा उत्तराखंड क्रांति दल क यूकेडी केंद्रीय मीडिया प्रभारी शिवप्रसाद सेमवाल, मीना थपलियाल,  संजीव भट्ट,  विपिन रावत, पंकज उनियाल छायीं।