उत्तराखण्डा चार सीटु पर अपणा प्रत्याशियों क घोषणा कै याली, टिरी सीट मा बॉबी पंवार तैं समर्थन
देरादूण। यूकेडी न उत्तराखण्डा चार सीटु पर अपणा प्रत्याशियों क घोषणा कै याली। यूकेडी क् केंद्रीय अध्यक्ष पूरण सिंह कठैत न प्रेस कायी अर बतै कि पौड़ी गढ़वाल बिटि आशुतोष नेगी, हरद्वार बिटि मोहन असवाल, नैनीताल बिटि शिव सिंह रावत (पूर्व सैनिक) अर अल्मोड़ा लोकसभा बिटि अर्जुन देव तैं लोकसभा मा अपणु प्रत्याशी बणै।
वखि टिरी सीटपर उन्न बोलि कि टिरी लोकसभा बिटि उन्न क्वीं उमेदवार घोषित नी कायी अर उत्तराखण्ड बेरोजगार संघा क अध्यक्ष बॉबी पंवार तैं समर्थन द्यायी। बॉबी पंवार टिरी सीट बिटि निर्दलीय उमेदवार छन।
कठैत न बोल कि यूकेडी लोकसभा चुनौ खूणि त्यार च अर यूकेडी जनता क मुद्दों तैं लेकैकि जनता क बीच मा जाली। जैमा रूजगार, पलायन, मूल निवास, भू-कानून जनि मुद्दा छन। उन्न बोलि कि पाड़ बिटि पलायन जारी च अर सरकार पलायन रवक्णा मा पूरि तरौं नाकाम च।