जोशीमठ मा सुरू ह्वै द्वी दिनक मैराथन प्रतियोगिता

देरादूण। उत्तराखण्ड स्की माउंटेनियरिंग एसोसिएशन अर स्काई रनिंग एसोसिएशन क संयुक्त तत्वाधान मा जोशीमठ मा राष्ट्रीय स्तर क द्वी दिनक मैराथन प्रतियोगिता सुरु ह्वैग्यें। मुख्यमंत्री पुष्कर सिंह धामीन जोशीमठ नरसिंह अर नवदुर्गा मंदिर बटि प्रतियोगिता थैं सुरु कायी।

मुख्यमंत्री न प्रदेसा रैवासियौं थैं जोशीमठ ओली मा मैराथन सुरु हूंण फर बधै दे अर बोलि कि आज जोशीमठ औली बटि हिमालय मैराथन, फन रेस क दगड़ा-दगड़ि औरि खेळ सुरु हूंणू , हम सब्यौं खूंणि गौरवा बात च। उन्न बोलि हम खळाखळ उत्तराखण्ड मा इन्न काम भ्वां मा करणा क कोसिस करण छा जै से पर्यटकु थैं यख आण कु बढ़ौंणा मिलि सक्यां। उन्न बोल जोशीमठ मा उर्यूं यु खेळु कु आयोजन अर खेळु मा भाग लिंण वळा देस अर विदेसा खिलाडियौं खूंणि बौत-बौत बधै।

मुख्यमंत्री न बोलि कि जोशीमठ मा उर्यीं मैराथन म जरिया देस-दुन्या क पर्यटुकौं थैं यु रैबार जाळु कि औली अर जोशीमठ पूरी तरौं सुरक्षित च अर चारधाम जातरा खूंणि तयार च। उन्न बोलि कि जोशीमठ मा उर्यूं मैराथन यांकु प्रमाण च।

मुख्यमंत्रीन बोलि कि ऐसु क साल ह्यूं कम पोड़ि या से औली मा ंिवंटर्स गेम नी ह्वै साका पर आज जोशीमठ मा मैराथन क आयोजन हूंण से अब सबि काम अच्छा हि ह्वाला। उन्न बोलि देवभूमि उत्तराखण्ड अब तीर्थ जातरियौं अर पर्यटकु क स्वागत खूंणि तयार च।

स्की माउंटेनियरिंग एसोसिएशन क अध्यक्ष अजय भट्ट न बोलि कि औली मैराथन क जरिया स्काई रनिंग अर स्काई अल्ट्रा रेस उर्यें जाणि च। जैमा उत्तर प्रदेश उड़ीसा, आंध्र प्रदेश, दिल्ली, महाराष्ट्र, उत्तराखंड अर देस क औरि प्रदेसु बटि 300 से जादा एथलीट भाग लिंणा छन। जोशीमठ तोक क स्कुल अर ग्राम सभौं क ळोग बि भाग लिंणा छन। उन्न बोलि कि ऐसु क साल जनवरी मा जोशीमठ मा आपदा अर औली मा ह्यूं कम पोड़ि यां से विंटर गेम नी ह्वै।

ऐ मौका फर भाजपा प्रदेश अध्यक्ष महेंद्र प्रसाद भट्ट, कर्णप्रयाग विधायक अनिल नौटियाल, थराली विधायक भूपाल राम टम्टा, बीकेटीसी क अध्यक्ष अजेन्द्र अजय, बीजेपी क जिला अध्यक्ष रमेश मैखुरी, जोशीमठ नगर पंचायत अध्यक्ष शैलेन्द्र पंवार, ब्लाक प्रमुख हरीश पंवार, गोपेश्वर नगर पालिका अध्यक्ष पुष्पा पासवान, कर्णप्रयाग नगर पालिका अध्यक्ष दमयंती रतूड़ी, जिलाधिकारी हिमांशु खुराना, पुलिस अधीक्षक प्रमेंद्र डोबाल, सीडीओ डा. ललित नारायण मिश्र बि छायीं।