पौड़ी म बणलि चार किलोमीटर लम्बी सुरूंग, केन्द्र बटि मिलिग्यें मंजूरि

पौड़ी। पौड़ी सैर म अब नी लगलु जाम। हां यां खूंणि अब पौड़ी सैरा प्रेमनगर बटि चार किलोमीटर लम्बी सुरूंग बण्यें जाली। जु पौड़ी बटि घोड़ीखाल तक होलि। 800 करोड़ रुप्यौं क् यीं परियोजना तैं केन्द्रीय सड़क परिवहन अर राजमार्ग मंत्रालय न अपड़ि मंजूरी दे याली।

बतै दियां पौड़ी लोनिवि एनएच डिवीजन न शासन क जरिया प्रेमनगर गडोलिया बटि घोड़ीखाल तक सुरूंग बणौंणा कु प्रस्ताव केन्द्रीय सड़क परिवहन अर राजमार्ग मंत्रालय तैं भेजि छायीं। या सुरूंग एनएच 534 पर बण्यें जाली।

सुरूंग बणण से अब श्रीनगर बटि कोटद्वार जाण वला सीधा प्रेमनगर बटि घोड़ीखाल निकलि जाला। या सुरूंग श्रीनगर पौड़ी बुआखाल, घोड़ीखाल, ज्वालपा देवी सतपुली कोेटद्वार तैं ज्वाड़लि।

वखि ऐ बारा मा चीफ इंजीनियर , लोनिवि एनए खंड दयानंद न बोलि पौड़ी म सुरूंग बणौंणा खूंणि मंजूरि मिलि ग्यें। अब फिजिबिलिटी स्टडी, डीपीआर बणौंणा खूंणि कंसल्टेंट क भर्ति कर्यें जाली। उन्न बोलि कि सुरूंग बणण से पौड़ी शहर मा लगण वलु जामा दिकदारि (परेशानी) खतम ह्वै जाली।