गणेश जोशीक जैदाद मामलम, त्रिवेन्द्र रावतक सरकार तैं सलाह, ऐ मामला म निष्पक्ष रैंण चैंद
कैबिनेट मंत्री कु कमै से जादा जैदाद कु मामला अज्काल सब्यौं कु गिच्चांे मा च। अर ये मामला म प्रदेसा राजनीति खुब गरम ह्वीं च।
जख विपक्ष सरकार तैं घेरणु च, त वखि अब ऐ मामला म पैल्यक मुख्यमंत्री अर हरद्वार सासंद कु बयान ऐ। उन्न ऐ मामलम धामी सरकार तैं सलाह दे। त्रिवेन्द्र रावतन धामी सरकार तैं सलाह दे अर बोलि कि अपणु-पर्या छोड़िकि सरकार तैं न्याय धर्म तैं अपणौंण चैंद।
त्रिवेन्द्र रावतन सान्यूं-सानि म बोलि कि सरकार तैं ऐ मामला म निष्पक्ष रैंण चैंद अर अपणा लोगु तैं बचौंणा क बजाय निसाब दगड़ि खडु हूंण चैंद।
त वखि ऐ मामला म मुख्यमंत्री कु बयान ऐ कि हमरि सरकार छाळी (पारदर्शी) अर भ्रष्टाचार मुक्त च। उन्न बोलि हरेक चीज की जांच होलि अर जांच मा दूद कु दूद अर पाणि कु पाणि ह्वे जालु।
बतै दियां कि वकील विकेश नेगी न कैबिनेट मंत्री गणेश जोशीम कमै से जादा जैदाद च, यांकु आरोप लगै छायीं। ऐ मामला म उन्न विजिलेंस कोर्ट म याचिका दायर कायी अर गणेश जोशी पर मुकदमा दर्ज कैकि विजिलेंस से जवाब मांगि छायीं। विजिलेंस न जवाब म बतै क उन्न मुकदमा दर्ज करणा खुणि उत्तराखण्ड कैबिनेटा मंजूरि की इंतजार च। तबि बटि यु मामला छ्वीं-बत्थौं म च।