कैबिनेट मंत्री कु इस्तीफा मंगण वला दुर्गेश्वर लाल कु बदलि ग्यीं मिजाज

दून। ब्याली तक कैबिनेट मंत्री सुबोध उनियाल कु इस्तीफा मंगण वला भाजपा विधायक दुर्गेश्वर लाला क मिजाज आज बदलि ग्यीन। अब यु ब्वना छन कि यु हमरू परिवार कु झगड़ा च अर गुस्सा मा इन्न ह्वै जांद। अब द्वियों न माफी मांगि याली।

बतै दियां कि 2 जनवरी खूंणि पुरोला भाजपा विधायक दुर्गेश्वर लाल अर कैबिनेट मंत्री सुबोध उनियाल क बीच मा खूब जिरह ह्वैग्यें छायीं। दुर्गेश्रवर लाल क ब्वनु छायीं कि वु गोविन्द पुश विहार अर अपर यमुना टौंस वन प्रभागा डीएफओ तैं हटौंणा क मांग तैं लेकैकि मंत्री क घौर मा ज्यां छायीं। जख उन्न मंत्री तैं एक ज्ञापन द्यायी अर बतै कि डीएफओ लगातार जनता तैं परेशान करणु च अर विकास कामु म बारबार ख्चचया (अड़ंगा) लगौंणा रैंद।

यांका बाद ऐ मामला मा कैबिनेट मंत्री सुबोध उनियाल न उबरि प्रमुख वन संरक्षक तैं बुल्यें अर मामला मा जांच आदेश दीं। मंत्री सुबोध उनियाल कु ब्वन च कि विधायक दुर्गेश्वर लाला न आदेश तैं फाड़ि दे।

जैका बाद विधायक दुर्गेश्वर लाल मंत्री क घारक भैर धरना म बैठिग्यीं अर उन्न मंत्री पर जातिवाचक शब्द ब्वना कु आरोप लग्यें। जैका बाद मुख्यमंत्री न द्वियों तैं बुल्यें कि बात कायी। यांका बाद आज भाजपा प्रदेश अध्यक्ष महेंन्द्र भट्ट न विधायक दुर्गेश्वर लाल तैं पार्टी दप्तर मा बुल्यें।

खबर च कि प्रदेश अध्यक्ष न मंत्री क घौर क भैर धरना देंण पर विधायक दुर्गेश्वर लाल तैं खूब झाड़ लग्यें अर अनुशासन म रैंणा खूंणि बोलि।

यांक बाद विधाययक दुर्गेश्वर लाल न मिजाज बदलि ग्यें अर उन्न बोलि कि या घारक बात च कुटुम्दरि मा त झगड़ा हून्दू हि च।
एक ब्यटा भी अधिकार से अपड़ा बुबा तैं ब्वदु कि मिथैं यु काम करण, गुस्सा मा कुछ जिरह ह्वै जांद। मंत्री से क्वीं नराजगी नीं च। म्यारू काम जनता क सेवा करणा कु च।