पाणि बचौंण वास्ता औंण वळा दस -बीस सालै जरुरता हिसाब से प्लान त्यार करे ज्यां: मुख्यमंत्री

मुख्यमंत्री धामिन आज सचिवालयम पेयजल अर जलागमा बैठक कायी। एक मौका फर मुख्यमंत्रिन निर्देश दीं कि औंण वळा 30 सालु की जरुरत तैं देखिकि प्रदेसम पाणिकि कार्ययोजना बण्यें ज्यां। यां का दगड़ि बरखा कु पाणि बचौंणा अर धरति म पाणि कु स्तर बणौंणा वास्ता काम करे ज्यां।

बैठकम मुख्यमंत्रिन बोलि बोलि कि पाणि क स्रोत, गदना अर नौळा-धारौं तैं दुबरा ज्यूंदू करणा वास्ता लोगुकि मदत लिये ज्यां

मुख्यमंत्रिन बोलि पिणा कु पाणि, पाणि जमा करणु अर पाणि बचौंण खुणि औंण वळा दस -बीस सालै जरुरता हिसाब से प्लान त्यार करे ज्यां। मुख्यमंत्रिन प्रदेस आखिर केर तक गंगा कु पाणि पिण लैक हूंया यीं दिसा मा काम करणा निर्देश दींन। उन्न बोलि गंगा का सहायक गदनों पर एसटीपी लगौंण कु काम करे ज्यां। मुख्यमंत्रिन बोलि कि गंगाक् सफै का वास्ता लोगुकि मदत अर सुझौ बि लिये ज्यां।

मुख्यमंत्रिन बोलि कि जल जीवन मिशन मा लग्यां कनेक्शनम लोगु तैं सदनि पाणि मिलण चैंद अर पुराण पाणि क स्रोत तैं दुबरा ज्यूंद करणा दगड़ि नै स्रोत बि ख्वजे ज्यां। जै से रूड़िम पाणि दिक्कत नी हूंण चैंद।

मुख्यमंत्रिन बोलि पाणिक् टैंका लगातार सफै करे ज्यां। उन्न बोलि कि पिणा पाणि की गुणवत्ता की बग्त-बग्त मा टेस्टिंग करे ज्यां अर लोगु तैं प्राकृतिक स्रोतु कु पाणि पिणा बराम जादा से जादा बतै ज्यां। लोगु तैं पाणिकि क्वीं दिक्कत नीं हूंण चैंद, यांका वास्ता टोल फ्री नम्बर दगड़ि हरेक जनपद मा कंट्रोल रूम बि बण्यें ज्यां।

मुख्यमंत्रिन बोलि कि 5 साल बिटि एक हि जगम नौकरि करणा कार्मिकौं कु सूची त्यारि करे ज्यां।
मुख्यमंत्रिन न मुख्य सचिव तैं बोलि कि जै बि विभागा संपत्ति कु क्वीं उपयोग नीं हूंणू च, वीं सम्पत्ति की समीक्षा कै कि सै उपयोग करै ज्यां।

मुख्यंत्रिन बोलि कि उत्तराखण्ण्ड युवा प्रदेस च यख काम करणा कु बौत संभौना छन। उन्न बोलि हमरि इन्न कोसिस हूंण चैंद कि प्रदेसम कुछ इन्न योजना बणिकि, जु हौरि प्रदेसु वास्ताबि मॉडल बण्यां।