भीमगौड़ा बैराज थैं क्वीं खतरा नीं च : सतपाल महाराज

देरादूण। प्रदेसा लोक निर्माण, पर्यटन, सिंचाई, लघु सिंचाई, पंचायतीराज, ग्रामीण निर्माण, संस्कृति, जलागम प्रबन्धन अर भारत-नेपाल उत्तराखण्ड नदी परियोजना मंत्री अर जनपद हरिद्वारा प्रभारी मंत्री सतपाल महाराज न बोलि कि भीमगौड़ा बैराज कु फाटक तड़कण (टूटना) से क्वीं खतरा नीं च। उन्न बोलि कि बरखा हूंणा क दगड़ा-दगड़ि पाणि लगातार निकळणु च।

महाराजन बोलि कि गेट ठीक करणा खूंणि मिन उत्तर प्रदेसा जल शक्ति अर बाढ़ नियंत्रण मंत्री स्वतंत्र देव सिंह तैं बोलि याली।
सतपाल महाराज न बोलि कि बस्गाल मा खळाखळ हूंणि बरखा न अबि तक 274 सड़क बन्द छायीं जैमा बटि 37 बाटौं तैं ख्वलें ग्यायीं अर औरि 237 बाटौं तैं ख्वलण खूंणि 213 जेसीबी लग्यीं छन, भोल तक जादा से जादा बाटौं तैं खोलि द्यूला।

महाराजन रोशनाबाद -बिहारीगढ़ मोटर मार्ग टूट्यूं पुळ कु निरीक्षण बि कायी। रोशनाबाद -बिहारीगढ़ मोटर मार्ग मा अनेकी नौं क जगा मा टूट्यूं पुळ कु निरीक्षण कै कि महाराजन बोलि कि टुट्यां पुळ क जगा मा वैली ब्रिज बणौंणा कु काम सुरु ह्वैग्यें अर जल्दी हम ऐ पुळ तैं छ्वटि गाड़ियों खूंणि खोळि द्युला।