जी-20 समिट मा सर्या दुन्या न भारता संस्कृति अर तागत देखि : मुख्यमंत्री धामी

देरादूण। मुख्यमंत्री धामीन न आज प्रधानमंत्री मोदी क जन्मबार क मौका फर नगर निगम देरादूण कु उर्यूं ‘स्वच्छता लीग मैराथन’ सुरू कायी। उन्न बाबा केदार, भगवान बदरी विशाल अर मां गंगा से प्रधानमंत्री क लम्बी उमरै अर सुखी-संति रैंणा कामना कायी।

मुख्यमंत्री धामी न बोलि कि प्रधानमंत्री मोदी क 9 सालै कार्यकाल म देस म बौत बड़ा-बड़ा काम हूंयीं। आज सर्या दुन्या म भारत कु मान, सम्मान अर स्वाभिमान बढ़िग्यें। भारत कु जस सर्या दुन्या मा बढ़िग्यें। उन्न बोलि प्रधानमंत्री क नेतृत्व मा जी 20 समिट म सर्या दुन्या न भारत संस्कृति अर तागत देखि। मुख्यमंत्री न बोलि कि प्रधानमंत्री न ‘श्री अन्न तैं अलग पछ्याण दिलौंणा कु काम कायी। आज भारत अर्थव्यवस्था क मामला मा सर्या दुन्या म पांचौं नम्बर पर च। मुख्यमंत्री न बोलि कि उत्तराखण्ड तैं प्रधानमंत्री कु पूरि मदत मिलणि च। सड़क, रेल अर हवै कनेक्टिविटी क काम तेजी से हूंण छन। पर्यटन, खेति-पाति, बग्वानी, शिक्षा अर स्वास्थ्य तोक म प्रदेस अगनै बढ़णु च।

ऐ मौका पर मेयर सुनील उनियाल गामा, विधायक खजान दास, नगर आयुक्त मनुज गोयल, अनिल गोयल बि छायीं।