उत्तराखण्ड बणणा बाद यख भ्रष्टाचार कु टरक उन्नि चलणु रायीं, बस फरक इतगा ह्वे कि अब डरैब अर जातरी द्विया यखका हि छन

ब्याली तक कांग्रेेसा हरक सिंह रावत सरकार फर हमला करणा छायीं त आज भाजपा का हि पैल्यक मुख्यमंत्री तीरथ सिंह रावत न उत्तराखण्ड क अप्सरु पर हमला कायी। तीरथ सिंह रावतन बोलि उत्तराखण्ड मा खुब भ्रष्टाचार हूंणूं च।

मसूरी क उर्यूं एक कार्यक्रम मा पौंछिकि उत्तराखण्ड पैल्यक मुख्यमंत्री तीरथ सिंह रावत न प्रदेसा अप्सरु पर सीधा हमला कायी। उन्न बोल कि उत्तराखण्ड बणणा बाद यख भ्रष्टाचार कु ट्रक उन्नि चलणु रायीं, बस फरक इतगा ह्वे कि अब डरैब अर जातरी द्विया यखका हि छन।

तीरथ सिंह रावतन बोलि कि उत्तराखण्ड पैलि उत्तरप्रदेस कु भाग छायीं तब ब्वलें जान्दु छायीं कि अप्सर यख बिटि टरक भ्वोरि कि लिजन्दिन पर अब त टरक बि यख कु हि च, अर काजू-बदाम खाण वला बि यखक हि लोग छन। उन्न बोलि कि जब उत्तराखण्ड आंदोलन चलणु छायीं तब लोग ब्वदा छायीं कि “कोदा-झंगोरा खाएंगे, उत्तराखण्ड बनाएंगे”, पर आज क्वीं या बात नी ब्वदु। उन्न बोलि जौ सुपिनौं खुणि उत्तराखण्ड बणि छायीं, वु आज बि पूरा नीं ह्वे।

तीरथ सिंह रावतन बोलि कि नेता कुछ अच्छा छन त कुछ खराब। उन्नि अप्सर बि द्वी तरौं का छन, कुछ ईमानदार त कुछ खराब छन। उन्न बोलि जब तक सरकार ढंग से काम नीं कारली तब तक जनता कु भलु नीं ह्वे सकदु।

तीरथ सिंह रावतन सुझौ द्यायी कि उत्तराखण्डा विकासा वास्ता नेता, अप्सर अर समाजा सबि लोगु तैं मिलकैकि काम करण प्वाड़लु। ईमानदार अर जनसेवा कु भाव हि उत्तराखण्ड तैं अगनै लिजालु उन्न बोलि कि अगर इन्नु नीं होलु त आंदोलनकारियों का स्वींणा कबि पूरा नीं ह्वे सकदा।