हर घर तिरंगा अभियान थैं मुख्यमंत्री न कायी सुरू

देरादूण। आजादी क अमृत महोत्सव थैं लेकैकि गांधी पार्क मा आज बड़ी रैळी उर्यें ग्यें। जैमा प्रदेस क मुख्यमंत्री पुष्कर सिंह धामी न भाग ल्यायी अर ऐ अभियान थैं सुरू कायी।

‘हर घर तिरंगा’ अभियान मा देरादूण क स्कुळि नौनौ भाग ल्यें अर प्रभात फेरी निकाळि।

देरादूण मा उर्यूं ऐ आयोजन मा मुख्यमंत्री न बोलि बल हमरू सर्यां देस आजादी क अमृत महोत्सव मनौंणु च। उन्न बोलि आणा वला 25 साल देस क अमृत काल ह्वाळा, जैमा देस अर प्रदेस मा नै विकासा नै अध्याय थैं लिख्यें जाळु।

ऐ आयोजन मा विद्यालयी शिक्षा अर उच्च शिक्षा मंत्री डॉ. धन सिंह रावतन बोलि कि प्रधानमंत्री क ब्वलण पर ‘हर घर तिरंगा’ अभियान थैं सर्या देस मनौंणु च। उन्न बोलि बल आण वला दिन मा प्रदेस क सबि राजकीय विद्यालय, महाविद्यालय अर विश्वविद्यालय मा ‘हर घर तिरंगा’ अभियान’ उर्यूं जाळु अर ज्वानु नौना मा राष्ट्र भावना जग्यें जाळि।
उन्न बोलि 15 तारिख खूंणि देस क आजादी थैं 75 साल हुंणा छन। ऐ साख मौका पर देस ‘ आजादी क अमृत महोत्सव’ मन्नौंण चु।

ऐ मौका फर विधायक खजान दास, मेयर सुनील उनियाल गामा, डीजीपी अशोक कुमार, सचिव सहकारिता बी.वी.आर.सी. पुरूषोत्तम, जिलाधिकारी देरादूण सोनिका, एस.एस.पी दलीप सिंह कुंवर, शिक्षा महानिदेशक वंशीधर तिवारी, उच्च शिक्षा, विद्यालयी शिक्षा अर सहकारिता विभाग क अफसर अर स्कुळि नौन्याळ न भाग ल्यें।