प्रदेस अग्वानया (अग्रणी) राज्य बणणा क दौड़ मा खळाखळ अगनै बढ़णु च : मुख्यमंत्री धामी

ऊधमसिंह नगर। मुख्यमंत्री धामी न नगर निगम रुद्रपुर ऊधमसिंह नगर मा उर्यूं कार्यक्रम मा 2435.11 लाख रुप्यौं क योजनौं कु लोकार्पण कायी। उन्न नगर निगम तोक रुद्रपुर मा सड़कियौं तैं ठीक करणा खूंणि द्वी करोड़ रुप्या देंणा घोषणा बि कायी। कार्यक्रम से पैलि मुख्यमंत्रीन नगर निगम मा बण्यूं महर्षि वाल्मीकि मंदिर मा पूजा कायी अर पर्यावरण मित्रु कु उर्यूं हवन यज्ञ मा भाग ल्यायी। उन्न बोलि कि रुद्रपुर मा 24 करोड़ से जादा विकास योजनौं कु लोकार्पण विकास खूंणि खास च। उन्न बोलि बल आण वळु बगत मा रुद्रपुर तैं कुड़ा क पाड़ु से निजात मिलि जाली। उन्न बोलि सरकार कु लक्ष्य द्वी-तीन साळु मा सहर तैं कूड़ा क पाडु से निजात दिलौंणा कु अर सहर तैं हारु बणौंणा कु लक्ष्य धर्यूं च।

मुख्यमंत्री न जनता से विनति कायी कि अपड़ा-अपड़ा घौर मा कूड़ा कु निस्तारण सुरु कर्या। कूड़ा कु दुबरा उपयोग कर्या अर वै से कुछ चीज बण्यां। उन्न बोलि कि प्रदेस सरकार न प्रदेस क सहरु तैं हारु अर साफ सहर बणौंणा क सौं लियीं च।
मुख्यमंत्री न बोलि कि हमरु लक्ष्य विकासा क धारा तैं समाज क आखिर मनखि तक पौंच्छाण क च, यां खूंणि हम दिन रात कोसिस करण छौ। उन्न बोलि प्रदेस अग्वानया (अग्रणी) राज्य बणणा क दौड़ मा खळाखळ अगनै बढ़णु च।

कार्यक्रम मा केंद्रीय पर्यटन अर रक्षा राज्यमंत्री अजय भट्ट, रूद्रपुर मेयर रामपाल सिंह बि बोलि। ऐ मौका फर विधायक शिव अरोरा, अरविंद पांडे, पैल्यक विधायक राजेश शुक्ला, बीजेपी जिलाध्यक्ष कमल जिन्दल, गुंजन सुखीजा, विकास शर्मा, डीएन मिश्रा छायीं।