रुजगार देंणा मामला मा प्रदेस तैं दूसर जगा मिलणु, धामी सरकार नीति पर ठप्पा : महेन्द्र भट्ट भट्ट

देरादूण। भाजपा न ईपीएफओ क रिपोर्ट क अधार फर उत्तराखण्ड तैं रुजगार देंणा बारा म दूसर जगा मिलण फर खुशी जतै अर बोलि यु धामी सरकार रूजगार देंणा योजनौं कु फल च अर रुजगार मुद्दौं फर नखरू स्वचण वलों खूंणि बुरु सुपिन जनु च।

प्रदेश अध्यक्ष महेन्द्र भट्ट न मीडिया क दगड़ बात कायी अर बोलि कि यीं विपक्ष तैं ऐना दिखौंण क अर प्रदेसा रैवासियों कु भरोसु क आंकड़ा छन, उन्न बोलि या आंकड़ा हमतैं बागेश्वर उपचुनौ मा रिकॉर्ड जीत द्याला।

प्रदेश अध्यक्ष महेन्द्र भट्ट न बोलि कि सबि प्रदेसा रैवासियाैं खूंणि खुसी बात च की ऐसु क साल रोजगार दिंणा मामला मा धामी सरकार तैं सर्या देस मा दुसरि जगा मिलि। यु सबि भ्रष्टाचार मुक्त, ईमानदार, अर पारदर्शी भर्ति कु नतीजा च।
धामी सरकार न ज्वान नौनों कु भवैष्य खूंणि देस मा सबसे बडु नकल विरोध कानून बण्यें। हमरि सरकार तैं जै बि भर्ति इमत्यान म नकल कु शक ह्वै, वु दुबरा कर्यें ग्यींन। प्रदेस मा भर्ति ऐजेन्सयौं बटि भ्रष्टाचार पूरि तरौं साफ कैकि सबि कसूरबारू तैं जेल भेज्यें ग्यें।

महेद्र भट्ट न आरोप लग्यें कि विपक्षी पार्टी ज्वानु तैं बखाणा कोसिस करणि छन, अर प्रदेसा महौल तैं खराब करणा कोसिस करणि छन। उन्न बोलि कि रुजगार देंणा मामला मा 6 मैना नतीजा बौत अच्छा छन, जु विपक्षा खूंणि बौत बड़ु झटका च। उन्न बोलि कि पैलि जनता ऐ बारा मा भरोसु नी करणि छायीं पर अब यीं आकड़ा बतौंणा छन अर ऊंका झूठा अरोपु क जवाब दंेणा छन। उन्न बोलि बागेश्वर चुनौं से पैलि अयीं प्रदेसा सफलता न एकदा दुबरा हमरि सरकार क दावा फर ठप्पा लग्यें दे, जैकु आशीर्वाद भाजपा क उमेदवार तैं जनता देंण वलि च।