सरकार यीं दुखा घडी मा धराली का रैवासियों दगड़ि खड़ी च, जु बि भलु होलु पूरू करण कोसिस करे जाली: CM

धराली आपदा औंणा बाद मुख्यमंत्री आपदा तोकम दौरा करणा छन। आपदा तिसर दिन आज मुख्यमंत्रिन आपद तोका दौरा कायी अर राहत बचाव का काम तैं देखि।

मुख्यमंत्री धामिन आपदा तोक धराली कु दौरा कायी अर अप्सरु तैं निर्देश दींन। मुख्यमंत्रिन आपदा प्रभावित कुटुम्दरि दगड़ि मुखाभेंट कायी अर ऊंकी पिड़ा सूणि कि सबि तरौं की मदत करणा कु भरोसु द्यायी।
मुख्यमंत्रिन बोलि कि सरकार झटाझट बिजली,पाणि अर संचार सुविधौं दगड़ि सड़क बणौंणा की कोसिस करणि च उन्न बोलि यांका दगडि लोगु तैं दुसर जगा बणौंणा की कोसिस बि सुरु करे जाणु च। मुख्यमंत्रिन आपदा तोकम लोगुक हूंया नुकसान कु आकलन करणा का डीएम तैं निर्देश बि दींन। ये मौका फर धराली क लोगुन मुख्यमंत्री से केदानाधाम जन्नि ऊतैं दुसर जगा बसौंण विनति कायी।

मुख्यमंत्रिन बोलि कि सरकार यीं दुखा घडी मा धराली का रैवासियों दगड़ि खड़ी च। उन्न बोलि जु बि भलु से भलु होलु वैथैं पूरु करण कोसिस करे जाली। मुख्यमंत्रिन बोलि कि सबि लोग काम पर लग्यां छन अबि तक 600 से जादा जातरियों तैं उत्तरकाशी अर देरादूण भ्यजे ग्यायी।

दूसर तरफां धराली म बिजली अर संचार सुविधा दुबरा सुरु ह्वेग्यीन अब सड़क्यिौं तैं ठीक करणा कु काम बौत तेजी से हूंण च। सरकारन धराली मा द्वी आईएएस अप्सर अर दो आईपीएस अप्सरु तैं राहव अर बचाव का कामु ला लगै याली। जतग बि आपदा प्रभावित छन ऊंका वास्ता खाणा बणौंण बन्दुबत एक ही जगा पर करे ग्यायी। हर्षिल, झाला, गंगोत्री म रक्यां जातरियों तैं ह्वै सेवा जरिया मातली भ्यजे जाणु च।

इस मौका पर तोका विधायक सुरेश चौहान, डीजीपी दीपम सेठ, गढ़वाल कमिश्नर विनय शंकर पांडेय, आईजी अरुण मोहन जोशी, डीएम प्रशांत आर्य, अधिकरी अर जनप्रतिनिधि बि छायीं।