सरकार कु पैलु काम जनता की सुख-सुविधा च अर यांका वास्ता सबि विभागु तैं पूरि जिम्मेबरि से काम करण प्वाड़लु: सीएम

मुख्यमंत्री धामी की अध्यक्षता म आज सचिवायल म राज्य स्तरीय दिशा समिति की पैलि बैठक उर्यें ग्यायी।
ऐ मौका फर मुख्यंत्रिन प्रदेस सरकार अर केंन्द्र सरकार योजनौं की परगति की समीक्षा कायी। बैठक मा कृषि, ग्रामीण विकास, शहरी विकास, स्वास्थ्य, शिक्षा, महिला अर बाल विकास, रोजगार, सामाजिक सुरक्षा, डिजिटल प्रौद्योगिकी, पर्यावरण अर खेल से जुड़ी योजनौं की कारवै पर चर्चा करे ग्यायी। मुख्यमंत्रिन अप्सरु तैं निर्देश दींन कि योजनौं तैं तेजी से करे ज्यां जै से लोगु तैं यांकु फैदा मिलि सक्यां। उन्न बोलि कि योजनौं मा पारदर्शिता, जिम्मेबरि अर द्वी विभागु का बीच मेल-मिलाप हूंण बौत जरुरी च।

मुख्यमंत्रिन खास कैकि बोलि कि प्रदेस तैं देसम अग्वान्या (अग्रणी) प्रदेस बणौंणा वास्ता खळाखळ काम करणि च। यामा क्वीं बि कमी नी करे जाणि च। बैठक मा मुख्यमंत्रिन बोलि कि तकनीकी युग मा कैबि काम पर नजर रखणु अर वैक काम तैं सफल बणौंणा वास्ता डिजिटल प्रौद्योगिकी कु जादा से जादा उपयोग करे ज्यां। उन्न बोलि कि सूचना देंणा अर जिम्मेबरि तय करण से क्वीं बि काम झटाझट हूंदन। उन्न बोलि कि जिमदार, गरीब, ब्यटुला अर ज्वानु तक योजनौं कु लाभ पौंछाणा वास्ता सबि विभागु तैं कोसिस करण चैंद।

मुख्यमंत्रिन बोलिकि प्रधानमंत्री कुसुम योजना जरिया लगण वला सौर ऊर्जा योजना का पंपु तैं लगौंण कु काम तेजी से करे ज्यां। मुख्यमंत्रिन प्रधानमंत्री ग्राम सड़क योजना क जरिा गौं मा झट सड़क सुविधा देंणा का निर्देश दींन।

मुख्यमंत्रिन बोलि कि सड़क कैबि क्षेत्रा वास्ता विकासा अधारशिला च अर प्रदेसा दूर दराज तोकम रैंण वला लोगु तैं सुविधा देंण अर विकास वास्ता बौत जरूरी च। मुख्यमंत्रिन बोलि कि योजनौं की सफलता वास्ता शासना दगड़ि जनप्रतिधियों अर वखक रैवासियों की भागीदारी बि जरूरी च। उन्न अप्सरु से या उमेद कायी कि वु जनप्रतिधियों दगड़ि योजना की बारम लगातार बात कारला। मुख्यमंत्रिन बोलि कि हमरु पैलु काम जनता तैं सुख-सुविधा दींणु च अर यांका वास्ता सबि विभागु तैं पूरि जिम्मेबरि से काम करण प्वाड़लु।

बैठक में कैबिनेट मंत्री गणेश जोशी, राज्यसभा सांसद नरेश बंसल, डॉ. कल्पना सैनी, विधायक सहदेव सिंह पुण्डीर, श्रीमती रेनू बिष्ट, सुरेश गढ़िया, शक्तिलाल शाह, हरीश धामी अर मनोज तिवारी छायीं।