मुख्यमंत्रीन अखिल भारतीय किसान मेळम भाग ल्यायी अर बोलि- यु कौथिग खेति-पाति कु एक कुंभ च

मुख्यमंत्री धामीन गोविन्द बल्लभ पंत कृषि एवं प्रौद्योगिकी विश्वविद्यालय पंतनगरम 116वु अखिल भारतीय किसान मेला अर कृषि उद्योग प्रदर्शनीक सुरुवात कायी। ऐ मौका पर मुख्यमंत्री कौथिगम लग्यां स्टॉलु तैं देखि अर हरेला उद्यान कु वर्चुअल सुरुवात कायी।

मुख्यमंत्री न किसाल मेळा अर कृषि उद्योग प्रदर्शनी क बधै द्यायी अर बोलि कि हरित क्रांतिम अपिण अलग पछ्याण बणौंण वला गोविन्द बल्लभ पंत कृषि अर प्रौद्योगिक विश्वविद्यालय कु उर्यूं कार्यक्रम म ऐकैकि बौत खुसी हूंणि च। उन्न बोलि कि इन्ना किसान म्यळा प्रदेसा किसान भै-बन्धु क तरक्कि म बौत बड़ी जिम्मेबरि निभौंदन। कृषि म्यळा जरिया वैज्ञानिक, किसान अर उद्यमी एक ही जगा म खेति-पातिक बारम नै अर तकनीकी अर जाणकारी तैं एक दुसर तैं बतौंन्दन।
जिमदार (किसान) तैं अच्छु बीज, अच्छा डाळा, खेति-पाति का औजार, मोळ (खाद) अर सबि खेति-पाति से जुड्यूं समान एक हि जगाम मिलि जन्दन। उन्न बोलि कि मिथैं उमेद च कि कौथिग म जु बि जाणकारी दिये जाणि च वीं जाणकारी से जिमदारू तैं जरुर फैदा होलु।

मुख्यमंत्री न बोलि कि हरेक साल उर्यें जाणु यु कौथिग खेति-पाति कु एक कुंभ च, जु जिमदारू तैं खेति-पातिक नै जाणकारी दिंणा कु काम करदु।

मुख्यमंत्री न बोलि कि जिमदारु तैं तीन लाख रुप्यौं कु करजा बिना ब्याज कु दिये जाणु च। जिमदारु तैं खेति-पाति का औजार मूल्यौंणा खुणि फार्म मशीनरी बैंक योजनक जरिया 80 प्रतिशत तककि सब्सिडी दी जाणी च। उन्न बोलि कि ग्यूं खरीद पर जिमदारू तैं एक क्विंटल पर 20 रुप्यां बोनस दिये जाणु च। गन्ना क कीमतम बि 20 रुप्यौं बढ़ै ग्यायी। मुख्यमंत्रीन बोलि कि जिमदरु खुणि पुंग्ड़ म पाणि लगौंणा खुणि नहरा कु पाणि मुफत कै याली। च्या बागान धौलादेवी, मुन्स्यारी, बेतालघाट कु जैविक च्या बागान म बदलि करे ग्यायी। सगंध खेती तैं अगनै बढ़ौंणा खुणि 6 एरोमा वैली बण्यें जाणा कु काम हूंणू च।

मुख्यमंत्री न बोलि ऐसु साल बजट म 200 करोड़ रुप्यौं कु बंदुबस्त खास कैकि पॉलीहाउस बणौंणा खुणि करे ग्यायी। जै से जिमदारू क कमै अर रुजगार का साधन बढ़ये जाला।

ऐ मौका पर विधायक शिव अरोड़ा, तिलक राज बेहड़, राज्य मंत्री अनिल कपूर डब्बू, पैल्यक विधायक राजेश शुक्ला, जिलाध्यक्ष भाजपा कमल जिंदल अर जिलाधिकारी उदय राज सिंह, एसएसपी मणिकांत मिश्र, मुख्य विकास अधिकारी मनीष कुमार, जनप्रतिनिधि, अधिकारी अर जिमदार छायीं।