मुख्यमंत्री न विश्व हिन्दू परिषदा कु उर्यूं केन्द्रीय मार्ग -दर्शक मण्डल मा भाग ल्यायी

देरादूण। मुख्यमंत्री धामी न आज हरद्वार मा विश्व हिन्दू परिषदा कु उर्यूं केन्द्रीय मार्ग-दर्शक मण्डल क बैठक मा भाग ल्यायी। ऐ मौका फर उन्न दीयु जगै कि कार्यक्रम तैं सुरू कायी अर संत- महात्माऔं कु आशीष ल्यायी।

मुख्यमंत्री न बोलि कि प्रधानमंत्री मोदी क नेतृत्व मा धर्म अर संस्कृति खळाखळ अगनै बढ़णि च। उन्न बोलि कि अयोध्या मा श्री राम कु मन्दिर बणणा कु सुपिन पूरु हूंण च। वख भगवान श्री राम कु भव्य अर दिव्य मंदिर बणणु च। उन्न बोलि क चारधाम जातरा मा श्रद्धालु बौत बड़ी संख्या मा आणा छन अर केदारनाथ अर हेमकुंट धाम आण वळु बगत मा रोपवे बणि जाळु , जै से जातरा बौत असान ह्वै जाली। चारधाम जातरा क तरौं कुमौं मा मानसखण्ड मन्दिर माला मिशन मा काम हूंणा छन। मुख्यमंत्री न बोलि कि प्रदेस मा समान नागरिक संहिता खूंणि बण्यीं समिति न 90 प्रतिशत से जादा काम पूर कै याली, जु आण वळा 30 जुन तक अपणि रिर्पोट दे द्याला। मुख्यमंत्री न बोलि कि प्रदेस मा जबरदस्ती धर्म बदली करण वलों तैं रवक्णा खूंणि कटकुटु कानून बण्यें।

बैठक मा परम महामण्डलेश्वर स्वामी परमानन्द गिरिजी महाराज, शंकराचार्य वासुदेवानन्द सरस्वती जी, राम राजेश्वरा जी महाराज, महामण्डलेश्वर विश्वेश्वरानन्द जी महाराज, महामण्डलेश्वर यतीन्द्रानन्द गिरि जी, स्वामी विवेकानन्द जी महाराज न अपड़ा विचार रखिन।