मुख्यमंत्री न मुनस्यारी महोत्सव थैं कायी सुरु अर बोलि मुनस्यारी बटि जाणा कु ज्यूं नीं ब्वदु
पिथौरागढ़: मुख्यमंत्री न पिथौरागढ़ मा मुनस्यारी महोत्सव सुरू कायी। मुख्यमंत्री न बोलि कि मुनस्यारी थैं ‘सार संसार एक मुनस्यार’ किलैं ब्वलें जान्द, उन्न बोलि कि या बात यखि ऐकीं समझे जै सकद। उन्न बोलि कि मि छ्वटा बटि यखि क बगरैळु पाड़ थैं देखिक आकर्षित रैयूं। उन्न बोलि कि यख आवा अर यख बटि जाणा कु ज्यूं नीं ब्वदु। उन्न बोलि कि मुनस्यारी जन्नि जगा सर्या दुन्या मा मिलणि मुसकिल च।
मुख्यमंत्रीन बोलि कि पिथौरागढ़ मा मेडिकल कॉलेज अर मुनस्यारी मा एकलब्य विद्यालय ख्वलें जालु।
मुख्यमंत्री न बोलि कि उत्तराखण्ड थैं अग्वानया (अग्रणी) प्रदेस बणौंणा खूंणि हम कोसिस करणा छा अर या खूंणि हमन योजना बण्यें याली।
मुख्यमंत्री न अगनैं बोलि कि पर्यटन अर साहसिक खेलु अर जड़ी बूटि क डाळौं खूंणि मुनस्यारी बौत अच्छी जगा च। उन्न बोलि कि मुनस्यारी क विकास खूंणि सरकार कार्य योजना त्यार करणि च।